ਕੈਨੇਡਾ ਦੇ ਹਸਪਤਾਲਾਂ ਵਿੱਚ ਐਮਰਜੈਂਸੀ ਸੇਵਾਵਾਂ ਲਈ ਮਰੀਜ਼ਾਂ ਦੀ ਉਡੀਕ ਹੁਣ ਪਹਿਲਾਂ ਨਾਲੋਂ ਹੋਰ ਲੰਮੀ ਹੋ ਰਹੀ ਹੈ। ‘ਕੈਨੇਡੀਅਨ ਇੰਸਟੀਚਿਊਟ ਫਾਰ ਹੈਲਥ ਇਨਫਾਰਮੇਸ਼ਨ’ (CIHI) ਦੀ ਨਵੀਂ ਰਿਪੋਰਟ ਮੁਤਾਬਕ, 2024-25 ਦੌਰਾਨ ਹਸਪਤਾਲ ਵਿੱਚ ਦਾਖ਼ਲ ਹੋਏ ਹਰ 10 ਵਿੱਚੋਂ ਇੱਕ ਮਰੀਜ਼ ਨੂੰ ਐਮਰਜੈਂਸੀ ਰੂਮ ‘ਚ 48 ਘੰਟਿਆਂ ਤੋਂ ਵੱਧ ਉਡੀਕ ਕਰਨੀ ਪਈ। ਇਹ 2018-19 ਦੇ ਮੁਕਾਬਲੇ 12 ਘੰਟੇ ਵੱਧ ਹੈ, ਜਦੋਂ ਔਸਤ ਉਡੀਕ ਸਮਾਂ 36 ਘੰਟੇ ਸੀ।
ਰਿਪੋਰਟ ਅਨੁਸਾਰ, ਕੈਨੇਡਾ ਵਿੱਚ ਲਗਪਗ 17 ਫ਼ੀਸਦੀ (ਹਰ ਪੰਜ ਵਿੱਚੋਂ ਇੱਕ) ਬਾਲਗਾਂ ਕੋਲ ਕੋਈ ਪੱਕਾ ਫੈਮਲੀ ਡਾਕਟਰ (ਪਰਿਵਾਰਕ ਡਾਕਟਰ) ਨਹੀਂ ਹੈ। ਇਸ ਤੋਂ ਇਲਾਵਾ, ਜਿਨ੍ਹਾਂ ਕੋਲ ਡਾਕਟਰ ਹਨ, ਉਨ੍ਹਾਂ ਨੂੰ ਵੀ ਸ਼ਾਮ ਦੇ ਸਮੇਂ ਜਾਂ ਵੀਕੈਂਡ ‘ਤੇ ਸਮੇਂ ਸਿਰ ਇਲਾਜ ਨਹੀਂ ਮਿਲਦਾ। ਮਾਹਿਰਾਂ ਅਤੇ ਟੈੱਸਟਾਂ (ਜਿਵੇਂ ਐੱਮ ਆਰ ਆਈ ਜਾਂ ਸੀ ਟੀ ਸਕੈਨ) ਲਈ ਮਰੀਜ਼ਾਂ ਨੂੰ ਮਹੀਨਿਆਂਬੱਧੀ ਉਡੀਕ ਕਰਨੀ ਪੈਂਦੀ ਹੈ। ਨਤੀਜੇ ਵਜੋਂ, ਜਦੋਂ ਮਰੀਜ਼ਾਂ ਦੀ ਸਿਹਤ ਜ਼ਿਆਦਾ ਵਿਗੜ ਜਾਂਦੀ ਹੈ, ਤਾਂ ਉਨ੍ਹਾਂ ਕੋਲ ਐਮਰਜੈਂਸੀ ਵਾਰਡ ਜਾਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਬਚਦਾ। ਸੀ ਆਈ ਐੱਚ ਆਈ ਦੇ ਅੰਕੜੇ ਦੱਸਦੇ ਹਨ ਕਿ ਐਮਰਜੈਂਸੀ ਵਾਰਡ ਵਿੱਚ ਸਭ ਤੋਂ ਵੱਡੀ ਸਮੱਸਿਆ ਉਦੋਂ ਆਉਂਦੀ ਹੈ ਜਦੋਂ ਡਾਕਟਰ ਮਰੀਜ਼ ਦੀ ਗੰਭੀਰ ਹਾਲਤ ਦੇਖ ਕੇ ਉਸ ਨੂੰ ਹਸਪਤਾਲ ਵਿੱਚ ਦਾਖਲ (Admit) ਕਰਨ ਦਾ ਫ਼ੈਸਲਾ ਲੈਂਦੇ ਹਨ।
ਹਸਪਤਾਲਾਂ ਦੇ ਮੁੱਖ ਵਾਰਡਾਂ ਵਿੱਚ ਬੈੱਡ (ਬਿਸਤਰੇ) ਖ਼ਾਲੀ ਨਾ ਹੋਣ ਕਾਰਨ, ਦਾਖਲ ਕੀਤੇ ਗਏ ਮਰੀਜ਼ਾਂ ਨੂੰ ਕਈ-ਕਈ ਦਿਨ ਐਮਰਜੈਂਸੀ ਦੇ ਸਟਰੈਚਰਾਂ ‘ਤੇ ਹੀ ਕੱਟਣੇ ਪੈਂਦੇ ਹਨ। ਸਾਲ 2024-2025 ਦੇ ਅੰਕੜਿਆਂ ਮੁਤਾਬਕ, ਦਾਖਲ ਹੋਣ ਵਾਲੇ ਹਰ 10 ਵਿੱਚੋਂ ਇੱਕ ਮਰੀਜ਼ ਨੂੰ ਹਸਪਤਾਲ ਦੇ ਅੰਦਰ ਬੈੱਡ ਮਿਲਣ ਲਈ 48 ਘੰਟਿਆਂ (ਦੋ ਦਿਨਾਂ) ਤੋਂ ਵੱਧ ਸਮਾਂ ਉਡੀਕ ਕਰਨੀ ਪਈ, ਜੋ ਕਿ ਸਾਲ 2018-2019 ਦੇ ਮੁਕਾਬਲੇ 45 ਫ਼ੀਸਦੀ ਵੱਧ ਹੈ।
ਇਸ ਰਿਪੋਰਟ ਵਿੱਚ ਸਾਹਮਣੇ ਆਇਆ ਹੈ ਕਿ ਐਮਰਜੈਂਸੀ ਦਾ ਸਟਾਫ਼ ਇੱਕੋ ਵੇਲੇ ਦੋਹਰੀ ਜ਼ਿੰਮੇਵਾਰੀ ਨਿਭਾਉਣ ਲਈ ਮਜਬੂਰ ਹੈ। ਉਹ ਉਨ੍ਹਾਂ ਮਰੀਜ਼ਾਂ ਦੀ ਵੀ ਦੇਖਭਾਲ ਕਰ ਰਹੇ ਹਨ ਜੋ ਪਹਿਲਾਂ ਹੀ ਦਾਖਲ ਹਨ ਅਤੇ ਬੈੱਡ ਦੀ ਉਡੀਕ ਕਰ ਰਹੇ ਹਨ ਅਤੇ ਨਾਲ ਹੀ ਬਾਹਰੋਂ ਆ ਰਹੇ ਨਵੇਂ ਗੰਭੀਰ ਮਰੀਜ਼ਾਂ ਨੂੰ ਵੀ ਸੰਭਾਲ ਰਹੇ ਹਨ।
ਲੌਂਗ ਟਰਮ ਕੇਅਰ (LTC) ਅਤੇ ਹੋਮ ਕੇਅਰ ਦੀ ਘਾਟ: ਹਸਪਤਾਲ ਦੇ ਵਾਰਡਾਂ ਵਿੱਚ ਬੈੱਡ ਖ਼ਾਲੀ ਨਾ ਹੋਣ ਦਾ ਵੱਡਾ ਕਾਰਨ ਇਹ ਹੈ ਕਿ ਉੱਥੇ ਮੌਜੂਦ ਬਜ਼ੁਰਗ ਅਤੇ ਪੁਰਾਣੀਆਂ ਬਿਮਾਰੀਆਂ ਨਾਲ ਪੀੜਤ ਮਰੀਜ਼ਾਂ ਨੂੰ ਅੱਗੇ ‘ਲੌਂਗ ਟਰਮ ਕੇਅਰ’ (ਬਜ਼ੁਰਗਾਂ ਦੇ ਸੰਭਾਲ ਕੇਂਦਰਾਂ) ਜਾਂ ‘ਹੋਮ ਕੇਅਰ’ (ਘਰ ਵਿੱਚ ਦੇਖਭਾਲ) ਦੀਆਂ ਸਹੂਲਤਾਂ ਨਹੀਂ ਮਿਲ ਰਹੀਆਂ। ਸਿਸਟਮ ਵਿੱਚ ਅੱਗੇ ਰਸਤਾ ਸਾਫ਼ ਨਾ ਹੋਣ ਕਰਕੇ ਪੂਰੀ ਪ੍ਰਣਾਲੀ ਪਿੱਛੇ ਵੱਲ ਜਾਮ ਹੋ ਰਹੀ ਹੈ।
ਸਿਹਤ ਮਾਹਿਰਾਂ ਦਾ ਕਹਿਣਾ ਹੈ ਕਿ ਜਦੋਂ ਤੱਕ ਕਮਿਊਨਿਟੀ ਕੇਅਰ, ਫੈਮਲੀ ਡਾਕਟਰਾਂ ਦੀ ਉਪਲਬਧਤਾ ਅਤੇ ਬਜ਼ੁਰਗਾਂ ਦੀ ਸੰਭਾਲ ਦੇ ਪ੍ਰਬੰਧਾਂ ਵਿੱਚ ਸੁਧਾਰ ਨਹੀਂ ਕੀਤਾ ਜਾਂਦਾ, ਉਦੋਂ ਤੱਕ ਹਸਪਤਾਲਾਂ ਦੇ ਐਮਰਜੈਂਸੀ ਵਾਰਡਾਂ ‘ਤੇ ਇਹ ਬੋਝ ਅਤੇ ਮਰੀਜ਼ਾਂ ਦੀ ਖੱਜਲ-ਖ਼ੁਆਰੀ ਇਸੇ ਤਰ੍ਹਾਂ ਜਾਰੀ ਰਹੇਗੀ।
