ਭਾਰਤੀ ਬੈਡਮਿੰਟਨ ਪਲੇਅਰ ਸਾਇਨਾ ਨੇਹਵਾਲ ਨੇ ਐਤਵਾਰ ਦੇਰ ਰਾਤ ਆਪਣੇ ਪਤੀ ਤੇ ਬੈਡਮਿੰਟਨ ਪਲੇਅਰ ਪਾਰੂਪੱਲੀ ਕਸ਼ਯੱਪ ਤੋਂ ਵੱਖ ਹੋਣ ਦੀ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਇੰਸਟਾਗ੍ਰਾਮ ‘ਤੇ ਸਟੋਰੀ ਵਿਚ ਲਿਖਿਆ-ਬਹੁਤ ਸੋਚ-ਵਿਚਾਰ ਦੇ ਬਾਅਦ ਕਸ਼ਯੱਪ ਤੇ ਮੈਂ ਵੱਖ ਹੋਣ ਦਾ ਫੈਸਲਾ ਲਿਆ ਹੈ। ਸਾਇਨਾ ਨੇ ਲਿਖਿਆ ਜ਼ਿੰਦਗੀ ਕਦੇ-ਕਦੇ ਸਾਨੂੰ ਵੱਖ-ਵੱਖ ਦਿਸ਼ਾਵਾਂ ਵਿਚ ਲੈ ਜਾਂਦੀ ਹੈ। ਅਸੀਂ ਇਕ-ਦੂਜੇ ਲਈ ਸ਼ਾਂਤੀ ਤਰੱਕੀ ਤੇ ਉਭਰਨਾ ਚੁਣ ਰਹੇ ਹਾਂ। ਮੈਂ ਉਨ੍ਹਾਂ ਨਾਲ ਸਾਰੀਆਂ ਯਾਦਾਂ ਲਈ ਧੰਨਵਾਦੀ ਹਾਂ ਤੇ ਅੱਗੇ ਲਈ ਸ਼ੁੱਭਕਾਮਨਾਵਾਂ ਦਿੰਦੀ ਹਾਂ। ਸਾਡੀ ਨਿਜਤਾ ਨੂੰ ਸਮਝਣ ਤੇ ਉਸ ਦਾ ਸਨਮਾਨ ਕਰਨ ਲਈ ਧੰਨਵਾਦ।
ਸਾਇਨਾ ਨੇਹਵਾਲ ਨੇ 14 ਦਸੰਬਰ 2018 ਨੂੰ ਕਸ਼ਯੱਪ ਪਾਰੂਪੱਲੀ ਨਾਲ ਲਵਮੈਰਿਜ ਕੀਤੀ ਸੀ। ਦੋਵੇਂ 2007 ਤੋਂ ਰਿਲੇਸ਼ਨਸ਼ਿਪ ਵਿਚ ਸਨ। ਹਾਲਾਂਕਿ 2005 ਤੋਂ ਇਕ-ਦੂਜੇ ਨੂੰ ਜਾਣਦੇ ਸੀ। ਆਪਣੇ ਕਰੀਅਰ ਦੀ ਸ਼ੁਰੂਆਤੀ ਦਿਨਾਂ ਵਿਚ ਦੋਵੇਂ ਹੈਦਰਾਬਾਦ ਦੇ ਪੁਲੇਲਾ ਗੋਪੀਚੰਦ ਅਕੈਡਮੀ ਵਿਚ ਇਕੱਠੇ ਟ੍ਰੇਨਿੰਗ ਕਰਦੇ ਸਨ। ਸਾਇਨਾ ਨੇ ਹੈਦਰਾਬਾਦ ਵਿਚ ਪੀ. ਕਸ਼ੱਯਪ ਨਾਲ ਉਨ੍ਹਾਂ ਦੇ ਘਰ ‘ਤੇ ਵਿਆਹ ਕੀਤਾ ਸੀ। ਇਸ ਵਿਚ ਸਿਰਫ ਪਰਿਵਾਰ ਤੇ ਕਰੀਬੀ ਦੋਸਤ ਸ਼ਾਮਲ ਹੋਏ ਸਨ। ਦੋਵਾਂ ਨੇ 16 ਦਸੰਬਰ 2018 ਨੂੰ ਹੈਦਰਾਬਾਦ ਦੇ ਨੋਵੋਟੇਲ ਹੋਲ ਵਿਚ ਆਪਣੇ ਵਿਆਹ ਦੀ ਰਿਸੈਪਸ਼ਨ ਪਾਰਟੀ ਦਿੱਤੀ ਸੀ।
ਹਰਿਆਣਾ ਦੀ ਰਹਿਣ ਵਾਲੀ ਸਾਇਨਾ ਨੇਹਵਾਲ ਓਲੰਪਿਕ ਮੈਡਲ ਜਿੱਤਣ ਵਾਲੀ ਪਹਿਲੀ ਭਾਰਤੀ ਬੈਡਮਿੰਟਨ ਖਿਡਾਰੀ ਹੈ। ਉਨ੍ਹਾਂ ਨੇ ਲੰਦਨ ਓਲੰਪਿਕ-2012 ਵਿਚ ਭਾਰਤ ਨੂੰ ਕਾਂਸੇ ਦਾ ਤਮਗਾ ਦਿਵਾਇਆ ਸੀ। ਉਹ 2015 ਵਿਚ ਵੂਮੈਨਸ ਸਿੰਗਲਸ ਰੈਂਕਿੰਗ ਵਿਚ ਵਰਲਡ ਨੰਬਰ-1 ਪਲੇਅਰ ਰਹਿ ਚੁੱਕੀ ਹੈ। ਸਾਇਨਾ ਬੈਡਮਿੰਟਨ ਵਿਚ ਵਰਲਡ ਨੰਬਰ-1 ਰੈਂਕ ਹਾਸਲ ਕਰਨ ਵਾਲੀ ਇਕੋ-ਇਕ ਮਹਿਲਾ ਭਾਰਤੀ ਖਿਡਾਰੀ ਹੈ। ਉਹ 3 ਓਲੰਪਿਕ ਗੇਮਸ ਵਿਚ ਭਾਰਤ ਦੀ ਅਗਵਾਈ ਕਰ ਚੁੱਕੀ ਹੈ। ਸਾਇਨਾ ਨੇ 2010 ਤੇ 2018 ਦੇ ਕਾਮਨਵੈਲਥ ਗੇਮਸ ਵਿਚ ਗੋਲਡ ਮੈਡਲ ਜਿੱਤਿਆ ਸੀ। ਸਾਇਨਾ ਨੇ 2008 ਵਿਚ ਬੈਡਮਿੰਟਨ ਵਰਲਡ ਫੈਡਰੇਸ਼ਨ ਵਿਸ਼ਵ ਜੂਨੀਅਰ ਚੈਂਪੀਅਨਸ਼ਿਪ ਜਿੱਤ ਕੇ ਸੁਰਖੀਆਂ ਬਟੋਰੀਆਂ ਸਨ। ਉਸੇ ਸਾਲ ਉਨ੍ਹਾਂ ਨੇ ਪਹਿਲੀ ਵਾਰ ਓਲੰਪਿਕ ਵਿਚ ਹਿੱਸਾ ਲਿਆ। ਉਹ ਓਲੰਪਿਕ ਕੁਆਰਟਰ ਫਾਈਨਲ ਵਿਚ ਪਹੁੰਚਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਬਣੀ।
