ਰੋਮ:ਰਾਫੇਲ ਨਡਾਲ ਨੇ ਕਲੇਅ ਕੋਰਟ ਵਿਚ ਆਪਣਾ ਦਬਦਬਾ ਕਾਇਮ ਰੱਖਦਿਆਂ ਅੱਜ ਇਟਾਲੀਅਨ ਓਪਨ ਵਿੱਚ ਸ਼ਾਪੋਵਾਲੋਵ ਨੂੰ ਤਿੰਨ ਸੈੱਟਾਂ ਵਿਚ ਹਰਾ ਕੇ ਕੁਆਰਟਰ ਫਾਈਨਲ ਵਿਚ ਥਾਂ ਬਣਾ ਲਈ ਹੈ। 35 ਸਾਲਾਂ ਦੇ ਹੋਣ ਜਾ ਰਹੇ ਸਪੈਨਿਸ਼ ਖਿਡਾਰੀ ਨੇ 22 ਸਾਲਾ ਡੈਨਿਸ ਸ਼ਾਪੋਵਾਲੋਵ ਨੂੰ 3-6, 6-4 ਤੇ 7-6 ਨਾਲ ਹਰਾਇਆ। ਨਡਾਲ ਆਪਣਾ ਪਹਿਲਾ ਸੈੱਟ ਹਾਰਨ ਤੋਂ ਬਾਅਦ ਦੂਜੇ ਸੈਟ ਵਿਚ 3-0 ਨਾਲ ਪਿੱਛੇ ਚਲ ਰਿਹਾ ਸੀ ਪਰ ਉਸ ਨੇ ਮੈਚ ਵਿਚ ਵਾਪਸੀ ਕਰਦਿਆਂ ਸ਼ਾਨਦਾਰ ਖੇਡ ਦਿਖਾਈ। ਰੋਮ ਵਿਚ 9 ਵਾਰ ਦੇ ਚੈਂਪੀਅਨ ਰਹਿ ਚੁੱਕੇ ਨਡਾਲ ਦਾ ਅਗਲਾ ਮੁਕਾਬਲਾ ਅਲੈਗਜ਼ੈਂਡਰ ਜ਼ਵਾਰੇਵ ਨਾਲ ਹੋਵੇਗਾ ਜੋ ਸਾਲ 2017 ਦਾ ਚੈਂਪੀਅਨ ਰਹਿ ਚੁੱਕਾ ਹੈ। ਇਸ ਤੋਂ ਪਹਿਲਾਂ ਟੌਪ ਰੈਂਕਿੰਗ ਦੇ ਖਿਡਾਰੀ ਨੋਵਾਕ ਜੋਕੋਵਿਚ ਨੇ ਅਲੀਜਾਨਦਰੋ ਫੋਕੀਨਾ ਨੂੰ ਅਸਾਨੀ ਨਾਲ 6-2, 6-1 ਨਾਲ ਹਰਾਇਆ।
