ਕੋਲੰਬੋ, 14 ਸਤੰਬਰ
ਸ੍ਰੀਲੰਕਾ ਦੇ ਗੇਂਦਬਾਜ਼ ਲਸਿਥ ਮਲਿੰਗਾ ਨੇ ਕ੍ਰਿਕਟ ਨੂੰ ਅਲਵਿਦਾ ਆਖ ਦਿੱਤਾ ਹੈ। 38 ਵਰ੍ਹਿਆਂ ਦਾ ਮਲਿੰਗਾ 2014 ’ਚ ਟੀ-20 ਵਿਸ਼ਵ ਕੱਪ ਜਿੱਤਣ ਵਾਲੀ ਟੀਮ ਦਾ ਕਪਤਾਨ ਸੀ। ਉਸ ਨੇ ਸੋਸ਼ਲ ਮੀਡੀਆ ’ਤੇ ਸੰਨਿਆਸ ਲੈਣ ਦੇ ਫ਼ੈਸਲੇ ਦਾ ਐਲਾਨ ਕੀਤਾ ਹੈ। ਮਲਿੰਗਾ ਨੇ ਟਵੀਟ ਕੀਤਾ ਕਿ ਉਹ ਟੀ-20 ਕ੍ਰਿਕਟ ਨੂੰ ਅਲਵਿਦਾ ਆਖ ਰਿਹਾ ਹੈ ਅਤੇ ਕ੍ਰਿਕਟ ਦੀਆਂ ਹਰ ਤਰ੍ਹਾਂ ਦੀਆਂ ਸੀਰੀਜ਼ ਤੋਂ ਸੰਨਿਆਸ ਲੈ ਰਿਹਾ ਹੈ। ਉਸ ਨੇ ਇਕ ਵੀਡੀਓ ਵਿੱਚ ਕਿਹਾ ਕਿ ਉਹ ਕ੍ਰਿਕਟ ਨਹੀਂ ਖੇਡੇਗਾ ਪਰ ਖੇਡ ਪ੍ਰਤੀ ਉਸ ਦੀ ਮੁਹੱਬਤ ਕਦੇ ਖ਼ਤਮ ਨਹੀਂ ਹੋਵੇਗੀ। ਉਸ ਨੇ ਸ੍ਰੀਲੰਕਾ ਵੱਲੋਂ ਆਖ਼ਰੀ ਟੀ-20 ਮੁਕਾਬਲਾ ਮਾਰਚ 2020 ਵਿੱਚ ਪਲੇਕਲ ਵਿੱਚ ਵੈਸਟ ਇੰਡੀਜ਼ ਖ਼ਿਲਾਫ਼ ਖੇਡਿਆ ਸੀ।
