ਅਫਗਾਨਿਸਤਾਨ ਦੇ ਵਿਦੇਸ਼ ਮੰਤਰੀ ਆਮਿਰ ਖਾਨ ਮੁੱਤਕੀ ਇਨ੍ਹਾਂ ਦਿਨੀਂ ਭਾਰਤ ਵਿੱਚ ਹਨ। ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਤਾਲਿਬਾਨ ਸਰਕਾਰ ਦੇ ਮੰਤਰੀ ਨੇ ਭਾਰਤ ਦਾ ਦੌਰਾ ਕੀਤਾ ਹੈ, ਅਤੇ ਉਹ 9 ਤੋਂ 16 ਅਕਤੂਬਰ ਤੱਕ ਇੱਥੇ ਰਹਿਣਗੇ। ਹਾਲਾਂਕਿ ਉਨ੍ਹਾਂ ਦੇ ਇਸ ਦੌਰੇ ਨੂੰ ਭਾਰਤ ਅਤੇ ਤਾਲਿਬਾਨ ਸ਼ਾਸਨ ਵਿਚਾਲੇ ਸਬੰਧਾਂ ਨੂੰ ਠੀਕ ਕਰਨ ਦੀ ਕੋਸ਼ਿਸ਼ ਵਜੋਂ ਵੇਖਿਆ ਜਾ ਰਿਹਾ ਹੈ, ਪਰ ਹੁਣ ਜਾਵੇਦ ਅਖ਼ਤਰ ਨੇ ਇਸ ‘ਤੇ ਤਿੱਖੀ ਨਾਰਾਜ਼ਗੀ ਵਿਖਾਈ ਹੈ। ਉਨ੍ਹਾਂ ਨੇ ਇੰਨਾ ਤੱਕ ਕਹਿ ਦਿੱਤਾ ਕਿ ਉਨ੍ਹਾਂ ਦਾ ਸਿਰ ਸ਼ਰਮ ਨਾਲ ਝੁਕ ਗਿਆ ਹੈ।
ਫ਼ਿਲਮਾਂ ਤੋਂ ਲੈ ਕੇ ਸਮਾਜਿਕ ਮੁੱਦਿਆਂ ਤੱਕ ਆਪਣੀ ਬੇਬਾਕ ਰਾਏ ਰੱਖਣ ਵਾਲੇ ਜਾਵੇਦ ਅਖ਼ਤਰ ਨੇ ਟਵੀਟ ਰਾਹੀਂ ਉਹ ਗੱਲ ਕਹੀ ਹੈ, ਜੋ ਜਨਤਕ ਤੌਰ ‘ਤੇ ਬੋਲਣ ਤੋਂ ਖਾਸ ਤੌਰ ਤੇ ਬਚਦੇ ਹਨ। ਸ਼ਨੀਵਾਰ ਤੋਂ ਆਮਿਰ ਖਾਨ ਮੁੱਤਕੀ ਦਾ ਭਾਰਤ ਦੌਰਾ ਸ਼ੁਰੂ ਹੋ ਗਿਆ ਹੈ। ਉਹ ਉੱਤਰ ਪ੍ਰਦੇਸ਼ ਦੇ ਸਹਾਰਨਪੁਰ ਵਿਖੇ ਦਾਰੁਲ ਉਲੂਮ ਦੇਵਬੰਦ ਪਹੁੰਚੇ, ਜਿੱਥੇ ਉਨ੍ਹਾਂ ਦਾ ਜੋਰਾਂ ਸ਼ੋਰਾਂ ਨਾਲ ਸਵਾਗਤ ਕੀਤਾ ਗਿਆ।
ਡੰਕੇ ਦੀ ਚੋਟ ਤੇ ਜਾਵੇਦ ਅਖ਼ਤਰ ਦੀ ਨਾਰਾਜ਼ਗੀ
ਇਸੇ ਲਈ ਬਾਲੀਵੁੱਡ ਦੇ ਮਸ਼ਹੂਰ ਲੇਖਕ ਅਤੇ ਗੀਤਕਾਰ ਜਾਵੇਦ ਅਖ਼ਤਰ ਨੇ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ ਅਤੇ ਮੁੱਤਕੀ ਨੂੰ ਭਾਰਤ ਵਿੱਚ ਮਿਲੇ ਸਨਮਾਨ ਅਤੇ ਸਵਾਗਤ ਦੀ ਖੁੱਲ੍ਹ ਕੇ ਆਲੋਚਨਾ ਕੀਤੀ ਹੈ। ਆਪਣੇ ਟਵੀਟ ਵਿੱਚ ਉਨ੍ਹਾਂ ਨੇ ਲਿਖਿਆ, ‘ਦੁਨੀਆਂ ਦੇ ਸਭ ਤੋਂ ਬੁਰੇ ਅਤੇ ਖੂਨੀ ਅੱਤਵਾਦੀ ਗਰੁੱਪ ਤਾਲਿਬਾਨ ਦੇ ਪ੍ਰਤੀਨਿਧੀ ਨੂੰ ਉਨ੍ਹਾਂ ਲੋਕਾਂ ਵੱਲੋਂ ਸਨਮਾਨ ਅਤੇ ਸਵਾਗਤ ਦੇਖ ਕੇ, ਜੋ ਹਰ ਤਰ੍ਹਾਂ ਦੇ ਅੱਤਵਾਦੀਆਂ ਵਿਰੁੱਧ ਬੋਲਦੇ ਹਨ, ਮੇਰਾ ਸਿਰ ਸ਼ਰਮ ਨਾਲ ਝੁਕ ਗਿਆ ਹੈ।’ ਜਾਵੇਦ ਅਖ਼ਤਰ ਨੇ ਅੱਗੇ ਲਿਖਿਆ- ਦੇਵਬੰਦ ਨੂੰ ਵੀ ਸ਼ਰਮ ਆਉਣੀ ਚਾਹੀਦੀ। ਉਨ੍ਹਾਂ ਨੇ ਹੋਰ ਕਿਹਾ, ‘ਦੇਵਬੰਦ ਨੂੰ ਵੀ ਸ਼ਰਮ ਆਉਣੀ ਚਾਹੀਦੀ ਕਿ ਉਸ ਨੇ ਆਪਣੇ ਇਸਲਾਮਿਕ ਹੀਰੋ ਦਾ ਇੰਨਾ ਸਨਮਾਨਪੂਰਵਕ ਸਵਾਗਤ ਕੀਤਾ, ਜੋ ਉਨ੍ਹਾਂ ਵਿੱਚੋਂ ਇੱਕ ਹੈ ਜਿਸ ਨੇ ਲੜਕੀਆਂ ਦੀ ਸਿੱਖਿਆ ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾ ਦਿੱਤੀ ਹੈ। ਮੇਰੇ ਭਾਰਤੀ ਭਰਾ ਅਤੇ ਭੈਣੋ, ਸਾਡੇ ਨਾਲ ਕੀ ਹੋ ਰਹੇ ਹਾਂ?’
ਇਸ ਮੁੱਦੇ ਤੇ ਅਜੇ ਤੱਕ ਕਿਸੇ ਹੋਰ ਸੈਲੀਬ੍ਰਿਟੀ ਨੇ ਰਾਏ ਨਹੀਂ ਦਿੱਤੀ। ਅਖ਼ਤਰ ਦੇ ਇਸ ਪੋਸਟ ਤੇ ਆਮ ਜਨਤਾ ਵੱਲੋਂ ਖੂਬ ਵਿਚਾਰ ਸਾਂਝੇ ਕੀਤੇ ਜਾ ਰਹੇ ਹਨ।
