ਮੁੰਬਈ:ਫਿਲਮ ‘ਬੰਟੀ ਔਰ ਬਬਲੀ 2’ ਦੇ ਟਰੇਲਰ ਵਿੱਚ ਨਵੀਂ ਬਬਲੀ, ਸ਼ਰਵਰੀ ਨੇ ਦਰਸ਼ਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਇਸ ਵਿੱਚ ਬਿਕਨੀ ਪਹਿਨੀ ਅਦਾਕਾਰਾ ਨੂੰ ਲਹਿਰਾਂ ਪਿੱਛੇ ਛੱਡਦੇ ਹੋਏ ਫਰੇਮ ਵਿੱਚ ਆਉਂਦੇ ਦਿਖਾਇਆ ਗਿਆ ਹੈ। ਇਸ ਨੇ ਦਰਸ਼ਕਾਂ ਨੂੰ ਫਿਲਮ ‘ਦੋਸਤਾਨਾ’ ਵਿੱਚ ਪ੍ਰਿਯੰਕਾ ਚੋਪੜਾ ਦੀ ਬੀਚ ਵਾਲੀ ਦਿੱਖ ਯਾਦ ਕਰਵਾ ਦਿੱਤੀ ਹੈ। ਜਦੋਂ ਆਬੂਧਾਬੀ ਬੀਚ ’ਤੇ ਸ਼ਰਵਰੀ ਬਿਕਨੀ ਪਹਿਨ ਕੇ ਆਈ ਤਾਂ ਉਸ ਦੀ ਦਿੱਖ ਨੇ ਪੂਰੀ ਟੀਮ ਨੂੰ ਹੈਰਾਨ ਕਰ ਦਿੱਤਾ। ਇਸ ਬਾਰੇ ਉਸ ਨੇ ਕਿਹਾ, ‘‘ਜਿਸ ਦਿਨ ਮੈਂ ਇਹ ਸੀਨ ਸ਼ੂਟ ਕੀਤਾ, ਉਸ ਦਿਨ ਸੈੱਟ ’ਤੇ ਮੈਂ ਸਭ ਤੋਂ ਖ਼ੁਸ਼ ਵਿਅਕਤੀ ਸੀ। ‘ਦੋਸਤਾਨਾ’ ਵਿੱਚ ਪ੍ਰਿਯੰਕਾ ਚੋਪੜਾ ਦੀ ਸੁਨਹਿਰੀ ਬਿਕਨੀ ’ਚ ਸਮੁੰਦਰ ’ਚੋਂ ਬਾਹਰ ਨਿਕਲਣ ਦੀ ਤਸਵੀਰ ਮੇਰੇ ਦਿਮਾਗ ਵਿੱਚ ਉੱਕਰ ਗਈ ਸੀ। ਉਹ ਬਹੁਤ ਖੂਬਸੂਰਤ ਲੱਗ ਰਹੀ ਸੀ।’’ ਉਸ ਨੇ ਕਿਹਾ, ‘‘ਜਦੋਂ ਤੋੋਂ ਮੈਂ ਅਦਾਕਾਰ ਬਣਨ ਦਾ ਫ਼ੈਸਲਾ ਕੀਤਾ, ਉਦੋਂ ਤੋਂ ਹੀ ਮੇਰੀ ਇਸ ਤਰ੍ਹਾਂ ਦਾ ਸੀਨ ਕਰਨ ਦੀ ਇੱਛਾ ਸੀ। ਇਹ ਸੱਚਮੁੱਚ ਇਤਫਾਕ ਹੈ ਕਿ ‘ਬੰਟੀ ਔਰ ਬਬਲੀ 2’ ਦੀ ਸਕ੍ਰਿਪਟ ਵਿੱਚ ਮੇਰੇ ਲਈ ਬਿਕਨੀ ਪਾ ਕੇ ਸਮੁੰਦਰ ’ਚੋਂ ਬਾਹਰ ਆਉਣ ਦਾ ਇੱਕ ਸੀਨ ਸੀ। ਮੈਨੂੰ ਇਸ ’ਤੇ ਵਿਸ਼ਵਾਸ ਨਹੀਂ ਹੋ ਰਿਹਾ ਸੀ।’’ਇਹ ਫਿਲਮ ‘ਬੰਟੀ ਔਰ ਬਬਲੀ’ ਦਾ ਦੂਜਾ ਭਾਗ ਹੈ। ਇਸ ਵਿੱਚ ਦੋ ਜੋੜਿਆਂ ਨੂੰ ਇੱਕ-ਦੂਜੇ ਵਿਰੁੱਧ ਫਿਲਮਾਇਆ ਗਿਆ ਹੈ। ਸੈਫ ਅਲੀ ਖਾਨ ਅਤੇ ਰਾਣੀ ਮੁਖਰਜੀ ਪੁਰਾਣੇ ਬੰਟੀ ਅਤੇ ਬਬਲੀ ਦੀ ਭੂਮਿਕਾ ਅਦਾ ਕਰ ਰਹੇ ਹਨ। ਨਵੇਂ ਬੰਟੀ ਦੀ ਭੂਮਿਕਾ ‘ਗਲੀ ਬੁਆਏ’ ਲਈ ਜਾਣਿਆ ਜਾਣ ਵਾਲਾ ਸਿਧਾਂਤ ਚਤੁਰਵੇਦੀ ਅਤੇ ਨਵੀਂ ਬਬਲੀ ਦੀ ਭੂਮਿਕਾ ਸ਼ਰਵਰੀ ਅਦਾ ਕਰੇਗੀ। ਵਰੁਣ ਵੀ. ਸ਼ਰਮਾ ਦੇ ਨਿਰਦੇਸ਼ਨ ਅਤੇ ਯਸ਼ ਰਾਜ ਫਿਲਮਜ਼ ਦੇ ਬੈਨਰ ਹੇਠ ਬਣੀ ਇਹ ਫਿਲਮ 19 ਨਵੰਬਰ ਨੂੰ ਰਿਲੀਜ਼ ਹੋਵੇਗੀ।
