ਮੁੰਬਈ, 24 ਦਸੰਬਰ
ਬੌਲੀਵੁੱਡ ਅਦਾਕਾਰ ਸੋਨੂ ਸੂਦ ਐਕਸ਼ਨ ਫ਼ਿਲਮ ‘ਫ਼ਤਹਿ’ ਵਿੱਚ ਨਜ਼ਰ ਆਉਣਗੇ। ਇਸ ਫਿਲਮ ਦਾ ਨਿਰਦੇਸ਼ਨ ਅਭਿਨੰਦਨ ਗੁਪਤਾ ਕਰਨਗੇ। ਇਹ ਫ਼ਿਲਮ ਸੱਚੀਆਂ ਘਟਨਾਵਾਂ ’ਤੇ ਆਧਾਰਿਤ ਹੈ। ਇਸ ਵਿਚ ਅਦਾਕਾਰ ਸੂਦ ਐਕਸ਼ਨ ਹੀਰੋ ਦੇ ਰੂਪ ਵਿਚ ਨਜ਼ਰ ਆਉਣਗੇ। ਪਿਛਲੀ ਵਾਰ ਰੋਹਿਤ ਸ਼ੈਟੀ ਦੀ ਫਿਲਮ ‘ਸਿੰਬਾ’ ਵਿਚ ਅਦਾਕਾਰੀ ਕਰਨ ਵਾਲੇ ਸੂਦ ਨੇ ਕਿਹਾ, ‘‘ਫਿਲਮ ਦੀ ਕਹਾਣੀ ਨੇ ਮੇਰਾ ਮਨ ਮੋਹ ਲਿਆ। ਇਹ ਇਕ ਅਜਿਹਾ ਵਿਸ਼ਾ ਹੈ ਜਿਸ ਵੱਲ ਸਾਨੂੰ ਧਿਆਨ ਦੇਣ ਦੀ ਲੋੜ ਹੈ। ਜਿਵੇਂ ਹੀ ਮੈਂ ਫ਼ਿਲਮ ਦੀ ਕਹਾਣੀ ਪੜ੍ਹੀ, ਮੈਨੂੰ ਮਹਿਸੂਸ ਹੋਇਆ ਕਿ ਮੈਨੂੰ ਫ਼ਿਲਮ ਦਾ ਹਿੱਸਾ ਬਣਨਾ ਚਾਹੀਦਾ ਹੈ। ਮੈਂ ਇਸ ਕਹਾਣੀ ਨੂੰ ਦਰਸ਼ਕਾਂ ਸਾਹਮਣੇ ਲਿਆਉਣ ਲਈ ਕਾਹਲਾਂ ਹਾਂ।’’ਇਸ ਫ਼ਿਲਮ ਦਾ ਨਿਰਮਾਣ ਜ਼ੀ ਸਟੂਡੀਓਜ਼ ਅਤੇ ਸ਼ਕਤੀ ਸਾਗਰ ਪ੍ਰੋਡਕਸ਼ਨਜ਼ ਵੱਲੋਂ ਕੀਤਾ ਜਾਵੇਗਾ। ਜ਼ੀ ਸਟੂਡੀਓਜ਼ ਦੇ ਸ਼ਾਰਿਕ ਪਟੇਲ ਨੇ ਕਿਹਾ, ‘‘ਸੋਨੂ ਚੰਗਾ ਸੁਲਝਿਆ ਹੋਇਆ ਕਲਾਕਾਰ ਹੈ। ਉਸ ਨੇ ਪਿਛਲੇ ਦਹਾਕੇ ਦੌਰਾਨ ਖੁਦ ਨੂੰ ਸਾਬਿਤ ਕੀਤਾ ਹੈ। ਉਸ ਨੇ ਪਿਛਲੇ ਸਾਲ ਤੋਂ ਜੋ ਕੁਝ ਕੀਤਾ ਹੈ, ਉਸ ਨੇ ਸੋਨੂ ਨੂੰ ਹੀਰੋ ਬਣਾ ਦਿੱਤਾ ਹੈ। ਮੈਨੂੰ ਯਕੀਨ ਹੈ ਕਿ ਦਿਲ ਖਿੱਚਵੀਂ ਕਹਾਣੀ ਦਾ ਪਾਤਰ ਬਣ ਕੇ ਸੋਨੂ ਦੀ ਵੱਡੀ ਸਕਰੀਨ ’ਤੇ ਵਾਪਸੀ ਲਈ ਹਰ ਵਰਗ ਦੇ ਦਰਸ਼ਕ ਉਤਾਵਲੇ ਹੋਣਗੇ।’’ ਇਹ ਫ਼ਿਲਮ ਦੇ ਸਾਲ 2022 ਵਿੱਚ ਰਿਲੀਜ਼ ਹੋਣ ਦੀ ਉਮੀਦ ਹੈ।
