ਮੁੰਬਈ:ਪੰਜਾਬੀ ਗਾਇਕ ਤੇ ਅਦਾਕਾਰ ਗਿੱਪੀ ਗਰੇਵਾਲ ਅਤੇ ਅਦਾਕਾਰਾ ਜੈਸਮੀਨ ਭਸੀਨ ਦੀ ਆਉਣ ਵਾਲੀ ਫ਼ਿਲਮ ‘ਹਨੀਮੂਨ’ ਦਾ ਨਵਾਂ ਗੀਤ ‘ਆ ਚੱਲੀਏ’ ਰਿਲੀਜ਼ ਕੀਤਾ ਗਿਆ ਹੈ। ਇਹ ਰੁਮਾਂਚਿਕ ਗੀਤ ਹੈ ਅਤੇ ਇਸ ਦੀ ਵੀਡੀਓ ਵਿੱਚ ਗਿੱਪੀ ਤੇ ਜੈਸਮੀਨ ਦੀ ਸ਼ਾਨਦਾਰ ਜੁਗਲਬੰਦੀ ਦਿਖਾਈ ਗਈ ਹੈ। ਇਸ ਗੀਤ ਦਾ ਫ਼ਿਲਮਾਂਕਣ ਲੰਡਨ ਵਿੱਚ ਕੀਤਾ ਗਿਆ ਹੈ ਅਤੇ ਇਸ ਨੂੰ ਬੀ. ਪਰਾਕ ਨੇ ਗਾਇਆ ਹੈ ਤੇ ਜਾਨੀ ਨੇ ਲਿਖਿਆ ਹੈ। ਗੀਤ ਬਾਰੇ ਗੱਲਬਾਤ ਕਰਦਿਆਂ ਗਿੱਪੀ ਗਰੇਵਾਲ ਨੇ ਆਖਿਆ,‘‘ਇਸ ਗੀਤ ਵਿੱਚ ਬੀ. ਪਰਾਕ ਅਤੇ ਜਾਨੀ ਨੇ ਬਹੁਤ ਸ਼ਾਨਦਾਰ ਕੰਮ ਕੀਤਾ ਹੈ। ‘ਆ ਚੱਲੀਏ’ ਇੱਕ ਮੁਹੱਬਤੀ ਗੀਤ ਹੈ।’’ ਬੀ. ਪਰਾਕ ਨੇ ਆਖਿਆ,‘‘ ਗੀਤ ‘ਆ ਚੱਲੀਏ’ ਦਾ ਤਰਾਨਾ ਕਲਾਸਿਕ ਹੈ ਅਤੇ ਗੀਤ ਸੁਣਨ ਵਾਲਾ ਖਿਆਲਾਂ ’ਚ ਗੁਆਚ ਜਾਂਦਾ ਹੈ। ਮੈਂ ਗੀਤ ’ਚ ਆਪਣਾ ਬਿਹਤਰੀਨ ਦਿੱਤਾ ਹੈ ਅਤੇ ਮੈਂ ਹੁਣ ਦਰਸ਼ਕਾਂ ਦੀ ਪ੍ਰਤੀਕਿਰਿਆ ਦੀ ਉਡੀਕ ਕਰ ਰਿਹਾ ਹਾਂ।’’ ਇਸ ਗੀਤ ਨੂੰ ਟੀ-ਸੀਰੀਜ਼ ਦੇ ਯੂਟਿਊਬ ਚੈਨਲ ’ਤੇ ਦੇਖਿਆ ਜਾ ਸਕਦਾ ਹੈ। ਜਾਣਕਾਰੀ ਅਨੁਸਾਰ ਫ਼ਿਲਮ ‘ਹਨੀਮੂਨ’ ਅਮਰਪ੍ਰੀਤ ਜੀ.ਐੱਸ. ਛਾਬੜਾ ਨੇ ਨਿਰਦੇਸ਼ਿਤ ਕੀਤੀ ਹੈ ਅਤੇ ਭੂਸ਼ਨ ਕੁਮਾਰ, ਕ੍ਰਿਸ਼ਨ ਕੁਮਾਰ, ਹਰਮਨ ਬਵੇਜਾ ਅਤੇ ਵਿੱਕੀ ਬਾਹਰੀ ਨੇ ਪ੍ਰੋਡਿਊਸ ਕੀਤੀ ਹੈ। ਇਹ ਫ਼ਿਲਮ ਸਿਨੇਮਾਘਰਾਂ ਵਿੱਚ ਆਗਾਮੀ 25 ਅਕਤੂਬਰ ਨੂੰ ਰਿਲੀਜ਼ ਹੋਵੇਗਾ।
