ਲੁਧਿਆਣਾ ਤੋਂ ਆਮ ਆਦਮੀ ਪਾਰਟੀ (ਆਪ) ਦੇ ਵਿਧਾਇਕ ਦੇ ਛੋਟੇ ਪੁੱਤਰ ਨੇ ਇੱਕ ਵਿਆਹ ਸਮਾਰੋਹ ਵਿੱਚ ਗੋਲੀਬਾਰੀ ਕੀਤੀ। ਵਿਧਾਇਕ ਦੇ ਪੁੱਤਰ ਨੇ ਖੁੱਲ੍ਹੇਆਮ ਹਵਾ ਵਿੱਚ 2 ਫਾਇਰ ਕੀਤੇ। ਉਸ ਦੇ ਵੱਡੇ ਭਰਾ ਨੇ ਉਸਨੂੰ ਗੋਲੀ ਚਲਾਉਣ ਤੋਂ ਰੋਕਣ ਦੀ ਕੋਸ਼ਿਸ਼ ਵੀ ਕੀਤੀ। ਹੁਣ ਮਾਮਲੇ ਨਾਲ ਜੁੜਿਆ ਇੱਕ ਵੀਡੀਓ ਵੀ ਸਾਹਮਣੇ ਆਇਆ ਹੈ, ਜਿਸਦੇ ਬੈਕਗ੍ਰਾਊਂਡ ਵਿੱਚ ਇੱਕ ਪੰਜਾਬੀ ਗੀਤ ਚੱਲ ਰਿਹਾ ਹੈ।
ਵਿਆਹ ਸਮਾਰੋਹ ਵਿਧਾਇਕ ਜੀਵਨ ਸਿੰਘ ਸੰਗੋਵਾਲ ਦੇ ਹਲਕੇ ਦੇ ਗਿੱਲ ਪਿੰਡ ਵਿੱਚ ਹੋਇਆ। ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਵਿਆਹ ਕਦੋਂ ਅਤੇ ਕਿੱਥੇ ਹੋਇਆ ਸੀ। ਪੁਲਿਸ ਦਾ ਕਹਿਣਾ ਹੈ ਕਿ ਵਿਧਾਇਕ ਦੇ ਪੁੱਤਰ ਨੂੰ ਇਸ ਮਾਮਲੇ ਵਿੱਚ ਪੁੱਛਗਿੱਛ ਲਈ ਬੁਲਾਇਆ ਗਿਆ ਹੈ। ਹਥਿਆਰ ਦੀ ਜਾਂਚ ਕੀਤੀ ਜਾਵੇਗੀ। ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਵਿਧਾਇਕ ਸੰਗੋਵਾਲ ਨੂੰ ਵੀ ‘ਆਪ’ ਹਾਈਕਮਾਨ ਨੇ ਦਿੱਲੀ ਬੁਲਾਇਆ ਹੈ।
ਇਸ ਦੌਰਾਨ ਵਿਧਾਇਕ ਜੀਵਨ ਸਿੰਘ ਸੰਗੋਵਾਲ ਨੇ ਕਿਹਾ ਕਿ ਵੀਡੀਓ ਵਿੱਚ ਗੋਲੀਬਾਰੀ ਕਰਨ ਵਾਲਾ ਉਸ ਦਾ ਪੁੱਤਰ ਹੈ। ਹਾਲਾਂਕਿ, ਉਸ ਨੇ ਦਾਅਵਾ ਕੀਤਾ ਕਿ ਉਸਦਾ ਪੁੱਤਰ, ਜਗਪਾਲ ਟੁਆਏ ਗਨ ਨਾਲ ਗੋਲੀ ਚਲਾ ਰਿਹਾ ਸੀ।
ਗੋਲੀਬਾਰੀ ਦਾ 5 ਸਕਿੰਟ ਦਾ ਵੀਡੀਓ ਸਾਹਮਣੇ ਆਇਆ ਹੈ। ਡੀਜੇ ਵਜ ਰਹੇ ਸਨ। ਗਾਣਾ ਚੱਲ ਰਿਹਾ ਸੀ ਸਾਡੀ ਪੰਤਾਲੀ ਤੇ ਪਚਾਸੀ ਬਿੱਲ ਬੋਰ, ਬੋਰਾਂ ਅੱਗੇ ਦੱਸ ਕੀਦਾ ਚਲਦ ਜੋਰ। ਇਸ ਦੌਰਾਨ ਵਿਧਾਇਕ ਦਾ ਛੋਟਾ ਪੁੱਤਰ ਜਗਪਾਲ ਡਾਂਸ ਫਲੋਰ ‘ਤੇ ਆਇਆ ਅਤੇ ਆਪਣੀ ਪਿਸਟਲ ਉਪਰ ਕਰਕੇ ਫਾਇਰ ਕਰਨੇ ਸ਼ੁਰੂ ਕਰ ਦਿੱਤੇ। ਇੱਕ ਤੋਂ ਬਾਅਦ ਇੱਕ ਉਸ ਨੇ 2 ਫਾਇਰ ਕੀਤੇ। ਵੀਡੀਓ ਵਿਚ ਵੱਡਾ ਭਰਾ ਦਵਿੰਦਰ ਸਿੰਘ ਉਰਫ ਲਾਡੀ ਵੀ ਦਿਖਾਈ ਦੇ ਰਿਹਾ ਹੈ, ਜੋ ਫਾਇਰਿੰਗ ਤੋਂ ਬਾਅਦ ਜਗਪਾਲ ਨੂੰ ਰੋਕਣ ਦ ਕੋਸ਼ਿਸ਼ ਕਰਦਾ ਨਜਰ ਆਈ। ਲੁਧਿਆਣਾ ਦੇ ਏਸੀਪੀ ਹਰਜਿੰਦਰ ਸਿੰਘ ਨੇ ਕਿਹਾ ਕਿ ਵਿਧਾਇਕ ਦੇ ਪੁੱਤਰ ਨੂੰ ਪੁੱਛਗਿੱਛ ਲਈ ਬੁਲਾਇਆ ਗਿਆ ਹੈ। ਉਸਨੂੰ ਵੀਡੀਓ ਵਿੱਚ ਦਿਖਾਈ ਦੇਣ ਵਾਲੇ ਹਥਿਆਰ ਨਾਲ ਜਾਂਚ ਲਈ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ। ਜਾਂਚ ਤੋਂ ਬਾਅਦ ਢੁਕਵੀਂ ਕਾਰਵਾਈ ਕੀਤੀ ਜਾਵੇਗੀ।
