ਚੰਡੀਗੜ੍ਹ 23 ਅਪ੍ਰੈਲ : ਸ਼੍ਰੋਮਣੀ ਅਕਾਲੀ ਦਲ ਦੇ ਜਰਨਲ ਸਕੱਤਰ ਅਤੇ ਸੀਨੀਅਰ ਅਕਾਲੀ ਆਗੂ ਪ੍ਰੇਮ ਸਿੰਘ ਚੰਦੂਮਾਜਰਾ ਨੇ ਬਿਆਨਜ਼ਾਰੀ ਕਰਦਿਆਂ ਜਾਣਕਾਰੀ ਦਿੱਤੀ ਕਿ ਉਨ੍ਹਾਂ ਵੱਲੋਂ ਹਾੜ੍ਹੀ ਦੀ ਫ਼ਸਲ ਦੌਰਾਨ ਹੋਈ ਬੇਮੌਸਮੀ ਬਾਰਿਸ਼ ਕਰਕੇ ਕਣਕ ਦੇ ਹੋਏ ਬਦਰੰਗ ਅਤੇ ਮਾਜੂ ਦਾਣਿਆਂ ਦੀ ਸਮੱਸਿਆ ਨੂੰ ਹੱਲ ਕਰਨ ਲਈ ਕਰਨ ਲਈ ਅੱਜ ਕੇਂਦਰੀ ਖਾਦ ਅਤੇ ਖੁਰਾਕ ਮੰਤਰੀ ਸ੍ਰੀ ਰਾਮ ਵਿਲਾਸ ਪਾਸਵਾਨ ਨੂੰ ਪੱਤਰ ਲਿਖ ਕੇ ਕਿਸਾਨਾਂ ਨੂੰ ਆ ਰਹੀ ਸਮੱਸਿਆ ਦਾ ਹੱਲ ਕਰਨ ਦੀ ਅਪੀਲ ਕੀਤੀ ।
ਇਸ ਸਮੇਂ ਚੰਦੂਮਾਜਰਾ ਨੇ ਕਿਹਾ ਕਿ ਭਾਰਤ ਸਰਕਾਰ ਅਤੇ ਖਰੀਦ ਏਜ਼ੰਸੀਆਂ ਦੇ ਨਿਯਮ ਤਹਿਤ ਪਹਿਲਾਂ ਹੀ ਕਣਕ ਦੇ ਛੇ ਫੀਸਦੀ ਤੱਕ ਮਾਜੂ ਦਾਣੇ ਦੀ ਖਰੀਦ ਕੀਤੀ ਜਾ ਸਕਦੀ ਹੈ, ਪ੍ਰੰਤੂ ਮੌਸਮ ਦੀ ਖਰਾਬੀ ਕਰਕੇ ਇਸ ਸਾਲ ਦਾਣੇ ਦੇ ਮਾਜੂ ਰਹਿਣ ਦੀ ਸਮਰੱਥਾ 15 ਤੋਂ 20 ਫੀਸਦੀ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਕਰਕੇ ਕਿਸਾਨਾਂ ਨੂੰ ਫ਼ਸਲ ਵੇਚਣ ਵਿੱਚ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਚੰਦੂਮਾਜਰਾ ਨੇ ਕਿਹਾ ਕਿ ਉਨ੍ਹਾਂ ਵੱਲੋਂ ਲਿਖੇ ਪੱਤਰ ਵਿੱਚ ਕੇਂਦਰ ਨੂੰ ਅਪੀਲ ਕੀਤੀ ਗਈ ਹੈ ਕਿ ਬੇਸ਼ੱਕ ਦਾਣੇ ਦੇ ਪਿਚਕਣ ਦੀ ਸਮਰੱਥਾ ਇਸ ਸਾਲ ਪਹਿਲਾਂ ਨਾਲੋਂ ਜਿਆਦਾ ਹੈ ਪਰ ਉਸ ਵਿਚੋਂ ਬਣਨ ਵਾਲਾ ਆਟਾ ਅਤੇ ਮੈਦਾ ਦੀ ਮਾਤਰਾ ਪਹਿਲਾਂ ਜਿੰਨ੍ਹੀ ਹੀ ਰਹਿਣ ਦੀ ਸੰਭਾਵਨਾ ਹੈ। ਜਿਸ ਕਰਕੇ ਸਰਕਾਰ ਖਰੀਦ ਏਜੰਸੀਆਂ ਨੂੰ ਦਿਸ਼ਾ ਨਿਰਦੇਸ਼ ਜਾਰੀ ਕਰਕੇ ਮਾਜੂ ਦਾਣੇ ਕਾਰਨ ਕਣਕ ਵੇਚਣ ਵਿੱਚ ਆ ਰਹੀ ਸਮੱਸਿਆ ਨੂੰ ਹੱਲ ਕਰੇ ।
ਇਸ ਸਮੇਂ ਚੰਦੂਮਾਜਰਾ ਨੇ ਕਿਹਾ ਕਿ ਦਾਣਿਆਂ ਦੇ ਮਾਜੂ ਰਹਿਣ ਦੇ ਨਾਲ-ਨਾਲ ਕਣਕ ਦਾ ਬਦਰੰਗ ਹੋਣ ਪਿੱਛੇ ਵੀ ਲਗਾਤਾਰ ਹੋਣ ਵਾਲੇ ਮੀਂਹਾਂ ਦਾ ਨਤੀਜਾ ਹੈ, ਉਹਨਾਂ ਕਿਹਾ ਕਿ ਭਾਂਵੇ ਦਾਣੇ ਹਲਕੇ ਬਦਰੰਗ ਜਰੂਰ ਹਨ, ਪਰ ਕਣਕ ਦੀ ਗੁਣਵੱਤਾ ਵਿੱਚ ਕੋਈ ਜਿਆਦਾ ਅੰਤਰ ਨਹੀਂ ਹੈ। ਇਸ ਸਮੇਂ ਉਨ੍ਹਾਂ ਕੇਂਦਰੀ ਮੰਤਰੀ ਨੂੰ ਬੇਨਤੀ ਕੀਤੀ ਕਿ ਕਰੋਨਾ ਜਿਹੀ ਮਹਾਂਮਾਰੀ ਦੇ ਚੱਲਦੇ ਪੂਰੇ ਦੇਸ਼ ਅੰਦਰ ਲਾਕਡਾੱਨ ਦੇ ਦੇਖਦਿਆਂ ਖਰੀਦ ਏਜੰਸੀ ਨੂੰ ਛੋਟਾਂ ਦੇ ਕੇ ਜਲਦ ਤੋਂ ਜਲਦ ਕਣਕ ਦੀ ਖਰੀਦ ਕਰਕੇ ਕਿਸਾਨਾਂ ਨੂੰ ਮੰਡੀਆਂ ਤੋਂ ਵਿਹਲੇ ਕਰਨ ਦੀ ਲੋੜ ਹੈ, ਜਿਸ ਨਾਲ ਸਮੁੱਚੇ ਕਿਸਾਨ ਭਾਈਚਾਰੇ ਅਤੇ ਦੇਸ਼ ਦੀ ਭਲਾਈ ਹੈ।
