ਟੋਰਾਂਟੋ : ਕੈਨੇਡਾ ਵਿਖੇ ਗ੍ਰੇਟਰ ਟੋਰਾਂਟੋ ਏਰੀਆ ਅਤੇ ਇਸ ਦੇ ਆਸ-ਪਾਸ ਇੱਕ ਆਟੋ ਚੋਰੀ ਅਤੇ ਬੀਮਾ ਧੋਖਾਧੜੀ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤੇ ਗਏ 12 ਵਿਅਕਤੀਆਂ ਵਿੱਚ ਇੱਕ 25 ਸਾਲਾ ਭਾਰਤੀ ਮੂਲ ਦਾ ਵਿਅਕਤੀ ਵੀ ਸ਼ਾਮਲ ਹੈ। ਪੀਲ ਰੀਜਨਲ ਪੁਲਿਸ ਨੇ ਬੁੱਧਵਾਰ ਨੂੰ ਕਿਹਾ ਕਿ 1.2 ਮਿਲੀਅਨ ਡਾਲਰ ਤੋਂ ਵੱਧ ਦੀ ਕੀਮਤ ਦੇ 9 ਚੋਰੀ ਹੋਏ ਵਾਹਨ ਜ਼ਬਤ ਕੀਤੇ ਗਏ ਅਤੇ ਪ੍ਰੋਜੈਕਟ ਮੈਮਫ਼ਿਸ ਨਾਮਕ ਜਾਂਚ ਵਿੱਚ 81 ਤੋਂ ਵੱਧ ਦੋਸ਼ ਲਗਾਏ ਗਏ।
ਮਿਸੀਸਾਗਾ ਤੋਂ ਰਾਹੁਲ ਬੇਦੀ ‘ਤੇ 5,000 ਡਾਲਰ ਦੀ ਧੋਖਾਧੜੀ ਕਰਨ ਅਤੇ ਚੋਰੀ ਹੋਏ ਸਮਾਨ ਦੀ ਤਸਕਰੀ ਕਰਨ ਦਾ ਦੋਸ਼ ਲਗਾਇਆ ਗਿਆ। ਹੋਰ ਦੋਸ਼ੀਆਂ ਦੇ ਨਾਲ ਉਸਨੇ ਕਈ ਵਿੱਤੀ ਅਤੇ ਬੀਮਾ ਸੰਸਥਾਵਾਂ ਨਾਲ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਪੀਲ ਰੀਜਨਲ ਪੁਲਿਸ ਦੇ ਮੁਖੀ ਨਿਸ਼ਾਨ ਦੁਰਾਈਪਾਹਮ ਨੇ ਕਿਹਾ,“ਪ੍ਰੋਜੈਕਟ ਮੈਮਫ਼ਿਸ ਇੱਕ ਗੁੰਝਲਦਾਰ ਅਤੇ ਬਹੁ-ਪੱਖੀ ਜਾਂਚ ਸੀ ਜਿਸ ਲਈ ਅਵਿਸ਼ਵਾਸ਼ਯੋਗ ਜਾਂਚ ਦੇ ਯਤਨਾਂ ਦੀ ਲੋੜ ਸੀ,”। ਉਸ ਨੇ ਅੱਗੇ ਕਿਹਾ,”ਇਸ ਜਾਂਚ ਦੀ ਸਫਲਤਾ ਪ੍ਰਭਾਵਸ਼ਾਲੀ ਸਹਿਯੋਗ ਅਤੇ ਹਰ ਕਿਸਮ ਦੀ ਅਪਰਾਧਿਕਤਾ ਨੂੰ ਰੋਕਣ ਦੇ ਸਾਂਝੇ ਟੀਚੇ ਦਾ ਪ੍ਰਮਾਣ ਸੀ।” ਜਾਂਚਕਰਤਾਵਾਂ ਨੇ ਕਿਹਾ ਕਿ ਪ੍ਰੋਜੈਕਟ ਨੇ “ਬੀਮਾ ਧੋਖਾਧੜੀ ਵਿੱਚ 350,000 ਡਾਲਰ ਨੂੰ ਰੋਕਿਆ” ਅਤੇ ਜਾਂਚ ਦੌਰਾਨ ਜ਼ਬਤ ਕੀਤੇ ਗਏ ਵਾਹਨਾਂ ਵਿੱਚ BMW, ਰੇਂਜ ਰੋਵਰ, ਬੈਂਟਲੇ ਬੇਨਟੇਗਾ, ਪੋਰਸ਼ੇ ਪਨਾਮੇਰਾ ਅਤੇ ਜੀਪ ਰੈਂਗਲਰ ਸ਼ਾਮਲ ਹਨ।
ਇਹ ਪ੍ਰੋਜੈਕਟ ਮਾਰਚ 2023 ਵਿੱਚ ਸ਼ੁਰੂ ਹੋਇਆ ਸੀ ਜਦੋਂ ਪੀਲ ਰੀਜਨਲ ਪੁਲਿਸ ਨੂੰ ਇੱਕ ਸੰਭਾਵਿਤ ਰੀ-ਵਿਨ ਕੀਤੇ ਵਾਹਨ ਦੀ ਜਾਣਕਾਰੀ ਪ੍ਰਦਾਨ ਕੀਤੀ ਗਈ ਸੀ। ਰੀ-ਵਿਨਿੰਗ ਵਿੱਚ ਵਾਹਨ ਦਾ ਅਸਲ ਪਛਾਣ ਨੰਬਰ, ਜਾਂ VIN, ਹਟਾ ਦਿੱਤਾ ਜਾਂਦਾ ਹੈ ਅਤੇ ਇੱਕ ਜਾਅਲੀ ਨੰਬਰ ਨਾਲ ਬਦਲ ਦਿੱਤਾ ਜਾਂਦਾ ਹੈ। ਜਾਂਚਕਰਤਾਵਾਂ ਨੇ ਇਹ ਨਿਰਧਾਰਿਤ ਕੀਤਾ ਕਿ ਚੋਰੀ ਹੋਏ ਵਾਹਨਾਂ ਵਿੱਚੋਂ ਕੁਝ ਨੂੰ ਦੁਬਾਰਾ ਵਿਨ ਕੀਤਾ ਜਾ ਰਿਹਾ ਸੀ, ਧੋਖੇ ਨਾਲ ਦੁਬਾਰਾ ਰਜਿਸਟਰ ਕੀਤਾ ਗਿਆ ਸੀ ਅਤੇ ਮਿਸੀਸਾਗਾ ਵਿੱਚ ਵੇਚਿਆ ਗਿਆ ਸੀ।
