ਮੁੰਬਈ, 12 ਮਈ
ਅਦਾਕਾਰਾ ਦਿਸ਼ਾ ਪਟਾਨੀ ਫਿਲਮ ‘ਰਾਧੇ: ਯੂਅਰ ਮੋਸਟ ਵਾਂਟੇਡ ਭਾਈ’ ਵਿੱਚ ਸਲਮਾਨ ਖ਼ਾਨ ਨਾਲ ਨਜ਼ਰ ਆਵੇਗੀ। ਇਹ ਫਿਲਮ ਈਦ ਮੌਕੇ ਡਿਜੀਟਲ ਮਾਧਿਅਮ ਰਾਹੀਂ ਰਿਲੀਜ਼ ਹੋਵੇਗੀ। ਦਿਸ਼ਾ ਇਸ ਤੋਂ ਪਹਿਲਾਂ ਫਿਲਮ ‘ਭਾਰਤ’ ਵਿੱਚ ਵੀ ਸਲਮਾਨ ਨਾਲ ਕੰਮ ਕਰ ਚੁੱਕੀ ਹੈ। ਉਸ ਦਾ ਕਹਿਣਾ ਹੈ ਕਿ ਸਲਮਾਨ ਨੂੰ ਨੱਚਦੇ ਦੇਖਣਾ ਵੱਖਰਾ ਆਨੰਦ ਦਿੰਦਾ ਹੈ। ਇਸ ਫਿਲਮ ਦੇ ਗੀਤ ‘ਸੀਟੀ ਮਾਰ’ ਜੋ 26 ਅਪਰੈਲ ਨੂੰ ਯੂ-ਟਿਊਬ ’ਤੇ ਜਾਰੀ ਕੀਤਾ ਗਿਆ ਸੀ, ਨੂੰ ਦਰਸ਼ਕਾਂ ਦਾ ਭਰਪੂਰ ਹੁੰਗਾਰਾ ਮਿਲਿਆ ਹੈ। ਇਸ ਨੂੰ ਹੁਣ ਤਕ ਇੱਕ ਕਰੋੜ ਤੋਂ ਵੱਧ ਲੋਕ ਦੇਖ ਚੁੱਕੇ ਹਨ। ਇਸ ਗੀਤ ਵਿੱਚ ਸਲਮਾਨ ਨਾਲ ਨੱਚਣ ਬਾਰੇ ਦਿਸ਼ਾ ਨੇ ਕਿਹਾ ਕਿ ਉਸ ਨੂੰ ਇਸ ਬਾਰੇ ਸਲਮਾਨ ਅਤੇ ਫਿਲਮ ਦੇ ਨਿਰਦੇਸ਼ਕ ਪ੍ਰਭੂ ਦੇਵਾ ਤੋਂ ਕਾਫ਼ੀ ਮਦਦ ਮਿਲੀ। ਦਿਸ਼ਾ ਨੇ ਕਿਹਾ, ‘ਸਲਮਾਨ ਤੇ ਪ੍ਰਭੂ ਸਰ ਨੇ ਮੇਰਾ ਮਾਰਗਦਰਸ਼ਨ ਕੀਤਾ। ਮੈਂ ਉਨ੍ਹਾਂ ਦੇ ਕਹੇ ਅਨੁਸਾਰ ਹੀ ਗੀਤ ਵਿੱਚ ਆਪਣਾ ਹੁਨਰ ਦਿਖਾਇਆ ਹੈ। ਸਲਮਾਨ ਨੇ ਗੀਤ ਵਿੱਚ ਵੱਖਰਾ ਜਾਦੂ ਭਰਿਆ ਹੈ। ਉਸ ਦਾ ਨੱਚਣ ਦਾ ਅੰਦਾਜ਼ ਨਿਰਾਲਾ ਹੈ। ਉਹ ਜਦੋਂ ਨੱਚਦਾ ਹੈ ਤਾਂ ਬੇਪਰਵਾਹ ਹੋ ਜਾਂਦਾ ਹੈ, ਜਿਵੇਂ ਉਸ ਨੂੰ ਕੋਈ ਦੇਖਦਾ ਹੀ ਨਾ ਹੋਵੇ।’’ ਫਿਲਮ ਦੀ ਸਫ਼ਲਤਾ ਬਾਰੇ ਪੁੱਛੇ ਜਾਣ ’ਤੇ ਉਸ ਨੇ ਕਿਹਾ ਕਿ ਉਹ ਇਸ ਬਾਰੇ ਜ਼ਿਆਦਾ ਨਹੀਂ ਸੋਚਦੀ। ਉਹ ਇਸ ਫਿਲਮ ਦਾ ਹਿੱਸਾ ਬਣ ਕੇ ਖ਼ੁਸ਼ ਹੈ।
