ਵਿਨੀਪੈਗ :ਪੰਜਾਬੀ ਗਾਇਕ ਅਤੇ ਅਦਾਕਾਰ ਰੌਸ਼ਨ ਪ੍ਰਿੰਸ ਦੇ ਨਿਰਦੇਸ਼ਨ ਹੇਠ ਬਣ ਰਹੀ ਪਹਿਲੀ ਪੰਜਾਬੀ ਫਿਲਮ ‘ਵਧਾਈਆਂ ਬਾਪੂ ਤੈਨੂੰ’ ਦੀ ਸ਼ੂਟਿੰਗ ਅੱਜ ਇੱਥੇ ਸ਼ੁਰੂ ਹੋਈ। ਫਿਲਮ ਵਿੱਚ ਰੌਸ਼ਨ ਪ੍ਰਿੰਸ ਮੁੱਖ ਭੂਮਿਕਾ ਵੀ ਨਿਭਾਉਣਗੇ। ਫਿਲਮ ਦੇ ਨਿਰਮਾਤਾ ਗਰਗ ਭਰਾ ਅਤੁਲ ਗਰਗ, ਸੰਜੀਵ ਗਰਗ ਤੇ ਸੁਨੀਲ ਗਰਗ ਹਨ। ਰੌਸ਼ਨ ਪ੍ਰਿੰਸ ਨੇ ਦੱਸਿਆ ਕਿ ਇਹ ਇਕ ਕਾਮੇਡੀ ਫਿਲਮ ਹੋਵੇਗੀ, ਜਿਸ ਵਿੱਚ ਇਕ ਇਨਸਾਨ ਦੀਆਂ ਕੈਨੇਡਾ ਵਿੱਚ ਆਉਣ ਦੀਆਂ ਖ਼ਾਹਿਸ਼ਾਂ ਦੇ ਨਾਲ-ਨਾਲ ਮਿੱਠੀਆਂ ਯਾਦਾਂ ਨੂੰ ਫਿਲਮਾਇਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਅੱਜ ਉਨ੍ਹਾਂ ਦਾ ਡਾਇਰੈਕਟਰ ਬਣਨ ਦਾ ਸੁਫ਼ਨਾ ਪੂਰਾ ਹੋਇਆ ਹੈ ਤੇ ਉਸ ਦਾ ਆਉਣ ਵਾਲਾ ਸਮਾਂ ਬਹੁਤ ਰੁਝੇਵੇਂ ਭਰਿਆ ਹੋਣ ਵਾਲਾ ਹੈ।
ਪੰਜਾਬੀ ਅਦਾਕਾਰ ਰੌਸ਼ਨ ਪ੍ਰਿੰਸ ਇਸ ਤੋਂ ਪਹਿਲਾਂ ‘ਨਾਨਕਾ ਮੇਲ’, ‘ਲਾਵਾਂ ਫੇਰੇ’, ‘ਮੁੰਡਾ ਫਰੀਦਕੋਟੀਆ’, ‘ਮੈਂ ਤੇਰੀ ਤੂੰ ਮੇਰਾ’, ‘ਇਸ਼ਕ ਬਰਾਂਡੀ’, ‘ਅਰਜਨ’ ਤੇ ‘ਮੁੰਡਿਆਂ ਤੋਂ ਬਚ ਕੇ ਰਹੀ’ ਵਰਗੀਆਂ ਫ਼ਿਲਮਾਂ ਕਰ ਚੁੱਕੇ ਹਨ। ਫਿਲਮ ‘ਵਧਾਈਆਂ ਬਾਪੂ ਤੈਨੂੰ’ ਵਿੱਚ ਗੁਰਪ੍ਰੀਤ ਘੁੱਗੀ, ਓਸ਼ੀਨ ਬਰਾੜ, ਯੋਗਰਾਜ ਸਿੰਘ, ਕਰਮਜੀਤ ਅਨਮੋਲ, ਅਵੀ ਰੰਧਾਵਾ, ਹਰਵੀ ਸੰਘਾ, ਮਲਕੀਤ ਰੌਣੀ, ਜਸ਼ਨ ਨਾਗਰਾ, ਕਾਜਲ ਸਿੰਘ ਪੰਨੂ, ਸਿਮਰਨ ਨਾਰੰਗ ਤੋਂ ਇਲਾਵਾ ਅਦਾਕਾਰ ਦਿਲਜੀਤ ਬਸਰਾ, ਗੁਰਪ੍ਰੀਤ ਬਰਾੜ, ਰਾਜਵੀਰ ਸਿੰਘ, ਪਰਮਵੀਰ ਤੇ ਜਸ਼ਨਜੀਤ ਨਾਗਰਾ ਵੀ ਅਹਿਮ ਭੂਮਿਕਾ ਨਿਭਾਉਣਗੇ। ਇਹ ਫਿਲਮ ਦੁਨੀਆ ਭਰ ਵਿੱਚ ਵਿਸਾਖੀ ਨੇੜੇ ਰਿਲੀਜ਼ ਕੀਤੀ ਜਾਵੇਗੀ।
