ਇੰਦੌਰ(ਮੱਧਪ੍ਰਦੇਸ਼), 5 ਅਪਰੈਲ
ਭਾਰਤ ਦੀ ਪਹਿਲੀ ਮਹਿਲਾ ਕਿ੍ਕਟ ਕਮੈਂਟੇਟਰ ਚੰਦਰਾ ਨਾਇਡੂ ਦਾ ਐਤਵਾਰ ਨੂੰ ਇਥੇ ਲੰਮੀ ਬਿਮਾਰੀ ਮਗਰੋਂ ਦੇਹਾਂਤ ਹੋ ਗਿਆ। ਉਹ 88 ਵਰ੍ਹਿਆਂ ਦੇ ਸਨ। ਉਹ ਭਾਰਤ ਦੇ ਪਹਿਲੇ ਟੈਸਟ ਕਪਤਾਨ ਸੀਕੇ ਨਾਇਡੂ ਦੀ ਧੀ ਸਨ। ਚੰਦਰਾ ਨਾਇਡੂ ਦੇ ਭਤੀਜੇ ਅਤੇ ਸਾਬਕਾ ਘਰੇਲੂ ਕ੍ਰਿਕਟਰ ਵਿਜੈ ਨਾਇਡੂ ਨੇ ਪੀਟੀਆਈ ਨੂੰ ਦੱਸਿਆ ਕਿ ਉਸ ਦੀ ਮਾਸੀ ਨੇ ਇਥੇ ਮਨੋਰਮਾਗੰਜ ਸਥਿਤ ਆਪਣੇ ਘਰ ਵਿੱਚ ਆਖਰੀ ਸਾਹ ਲਿਆ। ਉਨ੍ਹਾਂ ਦੱਸਿਆ ਕਿ ਚੰਦਰਾ ਨਾਇਡੂ ਲੰਮੇ ਸਮੇਂ ਤੋਂ ਉਮਰ ਸਬੰਧੀ ਬਿਮਾਰੀਆਂ ਤੋਂ ਪੀੜਤ ਸਨ। ਉਨ੍ਹਾਂ ਕੌਮੀ ਚੈਂਪੀਅਨ ਬੰਬੇ ਅਤੇ ਐਮਸੀਸੀ ਦੀਆਂ ਟੀਮਾਂ ਵਿਚਾਲੇ ਇੰਦੌਰ ਵਿੱਚ 1977 ਵਿੱਚ ਖੇਡੇ ਗਏ ਕਿ੍ਕਟ ਮੈਚ ਵਿੱਚ ਪਹਿਲੀ ਵਾਰ ਕਮੈਂਟਰੀ ਕੀਤੀ ਸੀ।
