ਮੁੰਬਈ:ਬੌਲੀਵੁਡ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਆਉਣ ਵਾਲੀ ਕਰਾਈਮ-ਡਰਾਮਾ ਸੀਰੀਜ਼ ‘ਦਹਾੜ’ ਵਿਚ ਪੁਲੀਸ ਅਧਿਕਾਰੀ ਦੇ ਕਿਰਦਾਰ ਵਿਚ ਨਜ਼ਰ ਆਵੇਗੀ। ਇਸ ਸੀਰੀਜ਼ ਜ਼ਰੀਏ ਸੋਨਾਕਸ਼ੀ ਓਟੀਟੀ ਪਲੈਟਫਾਰਮ ’ਤੇ ਪਹਿਲੀ ਵਾਰ ਨਜ਼ਰ ਆਵੇਗੀ ਜਿਸ ਦਾ ਨਿਰਮਾਣ ਰੀਮਾ ਕਾਗਤੀ ਅਤੇ ਜ਼ੋਇਆ ਅਖਤਰ ਵਲੋਂ ਕੀਤਾ ਗਿਆ ਹੈ। ਇਸ ਸੀਰੀਜ਼ ਦਾ ਪਹਿਲਾਂ ਪ੍ਰੀਮੀਅਰ ਦਿ ਬਰਲਿਨ ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ ਵਿੱਚ ਹੋਇਆ ਸੀ। ਇਹ ਸੀਰੀਜ਼ ਪ੍ਰਾਈਮ ਵੀਡੀਓਜ਼ ’ਤੇ 12 ਮਈ ਤੋਂ ਦਿਖਾਈ ਜਾਵੇਗੀ। ਸੀਰੀਜ਼ ਦੇ ਅੱਠ ਐਪੀਸੋਡ ਹੋਣਗੇ ਜਿਸ ਵਿਚ ਸੋਨਾਕਸ਼ੀ ਸਬ-ਇੰਸਪੈਕਟਰ ਅੰਜਲੀ ਭਾਟੀ ਦਾ ਕਿਰਦਾਰ ਨਿਭਾਏਗੀ। ਇਸ ਸੀਰੀਜ਼ ਦੇ ਸ਼ੁਰੂ ਵਿਚ ਕਈ ਔਰਤਾਂ ਰਹੱਸਮਈ ਢੰਗ ਨਾਲ ਵੱਖ-ਵੱਖ ਜਨਤਕ ਪਖਾਨਿਆਂ ਵਿਚ ਮ੍ਰਿਤਕ ਮਿਲਦੀਆਂ ਹਨ। ਆਰੰਭਿਕ ਜਾਂਚ ਵਿੱਚ ਇਹ ਮੌਤਾਂ ਖੁਦਕੁਸ਼ੀਆਂ ਪ੍ਰਤੀਤ ਹੁੰਦੀਆਂ ਹਨ ਪਰ ਜਿਵੇਂ-ਜਿਵੇਂ ਮਾਮਲੇ ਸਾਹਮਣੇ ਆਉਂਦੇ ਹਨ, ਅੰਜਲੀ ਨੂੰ ਸ਼ੱਕ ਹੋਣਾ ਸ਼ੁਰੂ ਹੋ ਜਾਂਦਾ ਹੈ ਕਿ ਇਹ ਕੰਮ ਕਿਸੇ ਸੀਰੀਅਲ ਕਿਲਰ ਦਾ ਹੈ। ਇਸ ਸੀਰੀਜ਼ ਵਿੱਚ ਵਿਜੈ ਵਰਮਾ ਤੇ ਗੁਲਸ਼ਨ ਦੇਵਈਆ ਵੀ ਅਹਿਮ ਭੂਮਿਕਾਵਾਂ ਨਿਭਾਉਣਗੇ। ਇਸ ਸੀਰੀਜ਼ ਨੂੰ ਐੱਕਸੈੱਲ ਮੀਡੀਆ ਐਂਡ ਐਂਟਰਟੇਨਮੈਂਟ ਤੇ ਟਾਈਗਰ ਬੇਬੀ ਨੇ ਪ੍ਰੋਡਿਊਸ ਕੀਤਾ ਹੈ।
