ਮੁੰਬਈ:ਫ਼ਿਲਮ ‘ਹੀਰੋਪੰਤੀ 2’ ਦੇ ਨਿਰਦੇਸ਼ਕ ਅਹਿਮਦ ਖਾਨ ਨੇ ਅਦਾਕਾਰ ਟਾਈਗਰ ਸ਼ਰੌਫ ਦੀਆਂ ਤਾਰੀਫ਼ਾਂ ਦੇ ਪੁਲ ਬੰਨ੍ਹਦਿਆਂ ਉਸ ਨੂੰ ਸਿਨੇ ਜਗਤ ਦਾ ਸਭ ਤੋਂ ਵੱਡਾ ਅਤੇ ਨੌਜਵਾਨ ਐਕਸ਼ਨ ਹੀਰੋ ਆਖਿਆ ਹੈ। ਅਹਿਮਦ ਨੇ ਕਿਹਾ, ‘‘ਟਾਈਗਰ ਨਾਲ ਕੰਮ ਕਰਨਾ ਹਮੇਸ਼ਾਂ ਘਰ ਆਉਣ ਵਰਗਾ ਮਹਿਸੂਸ ਹੁੰਦਾ ਹੈ। ਜਿਸ ਤਰ੍ਹਾਂ ਉਹ ਕਹਾਣੀ ਨੂੰ ਸਮਰਪਿਤ ਹੁੰਦਾ ਹੈ, ਉਹ ਬਹੁਤ ਸ਼ਲਾਘਾਯੋਗ ਹੈ। ਉਹ ਇਸ ਸਮੇਂ ਸਿਨੇ ਜਗਤ ਦਾ ਸਭ ਤੋਂ ਵੱਡਾ ਅਤੇ ਨੌਜਵਾਨ ਐਕਸ਼ਨ ਹੀਰੋ ਹੈ।’’ ਅਹਿਮਦ ਖਾਨ ਅਨੁਸਾਰ ਔਖੇ ਐਕਸ਼ਨ ਦ੍ਰਿਸ਼ਾਂ ਨੂੰ ਬਹੁਤ ਹੀ ਸੌਖਾ ਦਿਖਾਉਣਾ ਟਾਈਗਰ ਦੀ ਆਪਣੇ ਕੰਮ ਪ੍ਰਤੀ ਸਮਰਪਣ ਭਾਵਨਾ ਨੂੰ ਦਰਸਾਉਂਦਾ ਹੈ। ਉਸ ਨੇ ਕਿਹਾ, ‘‘ਕੰਮ ਕਰਨ ਲਈ ਇੰਨਾ ਵਧੀਆ ਅਦਾਕਾਰ ਹੋਣ ਤੋਂ ਇਲਾਵਾ ਉਹ ਨੌਜਵਾਨਾਂ ਵਿੱਚ ਸਭ ਤੋਂ ਵੱਡਾ ਅਦਾਕਾਰ ਹੈ। ਇਸੇ ਲਈ ਉਸ ਨਾਲ ਕੰਮ ਕਰਨ ਦਾ ਤਜਰਬਾ ਬਹੁਤ ਸ਼ਾਨਦਾਰ ਰਿਹਾ ਹੈ।’’ ਟਾਈਗਰ ਇਸ ਸਾਲ ਦੋ ਫ਼ਿਲਮਾਂ ‘ਹੀਰੋਪੰਤੀ’ ਅਤੇ ‘ਗਣਪਤ’ ਵਿੱਚ ਨਜ਼ਰ ਆਵੇਗਾ। ‘ਹੀਰੋਪੰਤੀ’ ਈਦ ਮੌਕੇ ਰਿਲੀਜ਼ ਹੋਵੇਗੀ ਅਤੇ ‘ਗਣਪਤ’ ਕ੍ਰਿਸਮਸ ਮੌਕੇ ਸਿਨੇਮਾ ਘਰਾਂ ਦਾ ਸ਼ਿੰਗਾਰ ਬਣਨ ਜਾ ਰਹੀ ਹੈ।
