ਨਵੀਂ ਦਿੱਲੀ, ਭਾਰਤੀ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਨੇ ਅੱਜ ਕਿਹਾ ਕਿ ਉਹ ਪਿੱਠ ਦਾ ਦਰਦ ਠੀਕ ਹੋਣ ਮਗਰੋਂ ਮਜ਼ਬੂਤੀ ਨਾਲ ਵਾਪਸੀ ਕਰੇਗਾ। 25 ਸਾਲ ਦੇ ਇਸ ਖਿਡਾਰੀ ਨੂੰ ਸੱਟ ਕਾਰਨ ਦੋ ਅਕਤੂਬਰ ਤੋਂ ਵਿਸ਼ਾਖਾਪਟਨਮ ਵਿੱਚ ਦੱਖਣੀ ਅਫਰੀਕਾ ਖ਼ਿਲਾਫ਼ ਸ਼ੁਰੂ ਹੋ ਰਹੀ ਲੜੀ ’ਚੋਂ ਬਾਹਰ ਬੈਠਣਾ ਪਿਆ ਹੈ।
ਬੁਮਰਾਹ ਨੇ ਟਵੀਟ ਕੀਤਾ, ‘‘ਸੱਟਾਂ ਖੇਡ ਦਾ ਹਿੱਸਾ ਹਨ। ਮੈਂ ਸੱਟ ਮਗਰੋਂ ਮਜ਼ਬੂਤੀ ਨਾਲ ਵਾਪਸੀ ਕਰਨ ਦਾ ਟੀਚਾ ਤੈਅ ਕੀਤਾ ਹੈ।’’ ਤਿੰਨ ਟੈਸਟ ਮੈਚਾਂ ਲਈ ਭਾਰਤੀ ਟੀਮ ਵਿੱਚ ਬੁਮਰਾਹ ਦੀ ਥਾਂ ਉਮੇਸ਼ ਯਾਦਵ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਬੁਮਰਾਹ ਦੇ ਅਗਲੇ ਮਹੀਨੇ ਬੰਗਲਾਦੇਸ਼ ਦੇ ਖ਼ਿਲਾਫ਼ ਟੀ-20 ਅਤੇ ਟੈਸਟ ਵਿੱਚ ਖੇਡਣ ਬਾਰੇ ਵੀ ਬੇਯਕੀਨੀ ਬਰਕਰਾਰ ਹੈ।
ਬੁਮਰਾਹ ਨੂੰ ਦੱਖਣੀ ਅਫਰੀਕਾ ਖ਼ਿਲਾਫ਼ ਹਾਲ ਹੀ ਵਿੱਚ ਖ਼ਤਮ ਹੋਈ ਟੀ-20 ਲੜੀ ਦੌਰਾਨ ਆਰਾਮ ਦਿੱਤਾ ਗਿਆ ਸੀ, ਜੋ 1-1 ਨਾਲ ਡਰਾਅ ’ਤੇ ਖ਼ਤਮ ਹੋਈ।
