ਚੰਡੀਗੜ੍ਹ ਤੋਂ ਭਾਜਪਾ ਦੀ ਸਾਬਕਾ ਸੰਸਦ ਮੈਂਬਰ ਕਿਰਨ ਖੇਰ ਨੂੰ ਸੈਕਟਰ-7 ਵਿਚ ਅਲਾਟ ਕੀਤੇ ਗਏ ਮਕਾਨ ਵਿਚ ਲਾਇਸੈਂਸ ਫੀਸ ਵਜੋਂ ਲਗਭਗ 13 ਲੱਖ ਰੁਪਏ ਦਾ ਬਕਾਇਆ ਹੈ। ਭਾਜਪਾ ਨੇਤਾ ਦੀ ਅਸਿਸਟੈਂਟ ਕੰਟਰੋਲਰ (ਐੱਫਐਂਡਏ) ਰੈਂਟਸ ਵੱਲੋਂ ਉਨ੍ਹਾਂ ਦੇ ਸੈਕਟਰ 8-ਏ ਸਥਿਤ ਕੋਠੀ ਨੰਬਰ 65 ਦਾ 24 ਜੂਨ 2025 ਨੂੰ ਇਸ ਬਾਬਤ ਨੋਟਿਸ ਭੇਜਿਆ ਗਿਆ ਹੈ ਜਿਸ ਵਿਚ ਉਨ੍ਹਾਂ ਨੂੰ ਜਲਦ ਪੈਸਾ ਜਮ੍ਹਾ ਕਰਾਉਣ ਲਈ ਕਿਹਾ ਗਿਆ ਹੈ। ਬਕਾਇਆ ਪੈਸਾ ਜਮ੍ਹਾ ਨਾ ਕਰਨ ‘ਤੇ ਕੁੱਲ ਬਕਾਇਆ ਰਕਮ ‘ਤੇ 12 ਫੀਸਦੀ ਵਿਆਜ ਵੀ ਲੱਗੇਗਾ।
ਦੱਸ ਦੇਈਏ ਕਿ ਪ੍ਰਸ਼ਾਸਨ ਵੱਲੋਂ ਸਾਬਕਾ ਸਾਂਸਦ ਨੂੰ 12,76,418 ਰੁਪਏ ਦਾ ਨੋਟਿਸ ਭੇਜਿਆ ਗਿਆ ਹੈ। ਇਹ ਰਕਮ ਸੈਕਟਰ-7 ਵਿਚ ਸਥਿਤ ਸਰਕਾਰੀ ਮਕਾਨ T-6/23 ਦੇ ਬਕਾਇਆ ਲਾਇਸੈਂਸ ਕਿਰਾਇਆ ਤੇ ਜੁਰਮਾਨੇ ਦੀ ਹੈ, ਜਿਸ ਵਿਚ ਕੁਝ ਹਿੱਸਿਆਂ ‘ਤੇ 100 ਫੀਸਦੀ ਤੇ 200 ਫੀਸਦੀ ਤੱਕ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਜੁਲਾਈ 2023 ਤੋਂ 5 ਅਕਤੂਬਰ 2024 ਤੱਕ ਸਾਧਾਰਨ ਲਾਇਸੈਂਸ ਕਿਰਾਇਆ, 6 ਅਕਤੂਬਰ 2024 ਤੋ 5 ਜਨਵਰੀ 2025 ਤੱਕ 3,64,620 ਦਾ 100 ਫੀਸਦੀ ਜੁਰਮਾਨਾ, 6 ਜਨਵਰੀ ਤੋਂ 12 ਅਪ੍ਰੈਲ 2025 ਤੱਕ 8,20,287 ਦਾ 200 ਫੀਸਦੀ ਜੁਰਮਾਨਾ। ਹੋਰ ਚਾਰਜ-26,106 ਰੁਪਏ (ਪੁਰਾਣੇ ਨੋਟੀਫਿਕੇਸ਼ਨ ਮੁਤਾਬਕ 8 ਨਵੰਬਰ 2017 ਤੋਂ) ਤੇ 59,680 ਰੁਪਏ (30 ਅਪ੍ਰੈਲ 205 ਤੱਕ 12 ਫੀਸਦੀ ਸਾਲਾਨਾ ਵਿਆਜ ਵਜੋਂ।
ਪ੍ਰਸ਼ਾਸਨ ਨੇ ਇਹ ਨੋਟਿਸ 24 ਜੂਨ 2025 ਨੂੰ ਕਿਰਨ ਖੇਰ ਦੇ ਸੈਕਟਰ-8ਏ ਸਥਿਤ ਘਰ ‘ਤੇ ਭੇਜਿਆ ਸੀ। ਨੋਟਿਸ ਵਿਚ ਕਿਹਾ ਗਿਆ ਹੈ ਕਿ ਜੇਕਰ ਤੈਅ ਸਮੇਂ ‘ਤੇ ਬਕਾਇਆ ਰਕਮ ਨਾ ਚੁਕਾਈ ਗਈ ਤਾਂ ਹਰ ਸਾਲ 12 ਫੀਸਦੀ ਵਾਧੂ ਵਿਆਜ ਲਿਆ ਜਾਵੇਗਾ। ਭੁਗਤਾਨ ਡਿਮਾਂਡ ਡਰਾਫਟ ਜਾਂ ਬੈਂਕ ਟਰਾਂਸਫਰ ਜ਼ਰੀਏ ਕਰਨ ਲਈ ਕਿਹਾ ਗਿਆ ਹੈ। ਭੁਗਤਾਨ ਤੋ ਪਹਿਲਾ ਕੈਸ਼ੀਅਰ ਤੋਂ ਵੇਰਵਾ ਲੈਣਾ ਜ਼ਰੂਰੀ ਹੋਵੇਗਾ।
