ਮੁੰਬਈ:ਅਦਾਕਾਰ ਅਤੇ ਫਿਲਮ ਨਿਰਮਾਤਾ ਸੋਨੂ ਸੂਦ ਅਤੇ ਕਾਮੇਡੀਅਨ ਕਪਿਲ ਸ਼ਰਮਾ ਇਸ ਵਾਰ ‘ਕੌਨ ਬਨੇਗਾ ਕਰੋੜਪਤੀ-13’ ਦੇ ‘ਸ਼ਾਨਦਾਰ ਸ਼ੁੱਕਰਵਾਰ’ ਐਪੀਸੋਡ ਵਿੱਚ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਣਗੇ। ਦੋਵੇਂ ਮਹਿਮਾਨ ਹੌਟ ਸੀਟ ’ਤੇ ਬੈਠ ਕੇ ਸ਼ੋਅ ਦੇ ਮੇਜ਼ਬਾਨ ਅਮਿਤਾਭ ਬੱਚਨ ਦੇ ਸਵਾਲਾਂ ਦੇ ਜਵਾਬ ਦੇਣਗੇ। ਸ਼ੋਅ ਦੌਰਾਨ ਦੋਵੇਂ ਕਲਾਕਾਰ ਆਪਣੇ ਜੀਵਨ ਅਤੇ ਕਿੱਤੇ ਨਾਲ ਜੁੜੇ ਕਈ ਕਿੱਸੇ ਵੀ ਸਾਂਝੇ ਕਰਨਗੇ। ਹਾਲ ਹੀ ਵਿੱਚ ਜਾਰੀ ਕੀਤੇ ਗਏ ਸ਼ੋਅ ਦੇ ਪ੍ਰੋਮੋ ਵਿੱਚ ਕਪਿਲ ਸ਼ਰਮਾ ਹਾਸਾ-ਠੱਠਾ ਕਰਦਾ ਦਿਖਾਈ ਦੇ ਰਿਹਾ ਹੈ। ਕਪਿਲ ਕਹਿ ਰਿਹਾ ਹੈ ਕਿ ਆਪਣੇ ਸ਼ੋਅ ਵਿੱਚ ਆਉਣ ’ਤੇ ਬਿੱਗ-ਬੀ ਆਏ ਹੋਏ ਮਹਿਮਾਨਾਂ ਨੂੰ ਪੀਣ ਲਈ ਵੀ ਚਾਰ ਆਪਸ਼ਨ ਚਾਹ, ਕਾਫ਼ੀ, ਲੱਸੀ ਜਾਂ ਸ਼ਿਕੰਜਵੀ ਪੁੱਛਦੇ ਹਨ। ਇਸ ਦੇ ਨਾਲ ਹੀ ਕਪਿਲ, ਅਮਿਤਾਭ ਬੱਚਨ ਦੀ ਰੀਸ ਕਰਦਾ ਵੀ ਦਿਖਾਈ ਦੇਵੇਗਾ। ਸ਼ੋਅ ਦੌਰਾਨ ਸੋਨੂ ਸੂਦ ਮਹਾਮਾਰੀ ਦੌਰਾਨ ਕੀਤੇ ਆਪਣੇ ਕੰਮ ਬਾਰੇ ਗੱਲਬਾਤ ਕਰੇਗਾ ਤੇ ਬੱਚਿਆਂ ਨੂੰ ਆਪਣੇ ਕਰੀਅਰ ਦੀ ਚੋਣ ਬਾਰੇ ਕਾਊਂਸਲਿੰਗ ਤੇ ਉਨ੍ਹਾਂ ਦੀ ਮਦਦ ਕਰਨ ਸਬੰਧੀ ਕੀਤੇ ਜਾ ਰਹੇ ਕੰਮ ਬਾਰੇ ਚਾਨਣਾ ਪਾਏਗਾ। ‘ਸ਼ਾਨਦਾਰ ਸ਼ੁੱਕਰਵਾਰ’ ਦਾ ਇਹ ਐਪੀਸੋਡ 12 ਨਵੰਬਰ ਨੂੰ ਸੋਨੀ ਟੀਵੀ ’ਤੇ ਪ੍ਰਸਾਰਿਤ ਕੀਤਾ ਜਾਵੇਗਾ।
