ਉੱਤਰਾਖੰਡ ਦੇ ਚਰਚਿਤ ਅੰਕਿਤਾ ਭੰਡਾਰੀ ਕਤਲਕਾਂਡ ਵਿੱਚ ਕੋਟਦਵਾਰ ਜ਼ਿਲ੍ਹਾ ਅਦਾਲਤ ਨੇ ਭਾਜਪਾ ਨੇਤਾ ਅਤੇ ਸਾਬਕਾ ਮੰਤਰੀ ਦੇ ਪੁੱਤਰ ਪੁਲਕਿਤ ਆਰੀਆ ਸਮੇਤ ਤਿੰਨ ਲੋਕਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਪੁਲਕਿਤ ਦੇ ਨਾਲ ਉਸ ਦੇ ਦੋ ਕਰਮਚਾਰੀ ਸੌਰਭ ਭਾਸਕਰ ਅਤੇ ਅੰਕਿਤ ਗੁਪਤਾ ਨੂੰ ਵੀ ਦੋਸ਼ੀ ਠਹਿਰਾਇਆ ਗਿਆ ਹੈ। ਇਹ ਫੈਸਲਾ ਮਾਮਲੇ ਦੇ 2 ਸਾਲ 8 ਮਹੀਨਿਆਂ ਬਾਅਦ ਆਇਆ ਹੈ।
ਖਬਰਾਂ ਅਨੁਸਾਰ, ਅਦਾਲਤ ਨੇ ਤਿੰਨਾਂ ਨੂੰ ਕਤਲ ਦਾ ਦੋਸ਼ੀ ਮੰਨਦੇ ਹੋਏ ਉਮਰ ਕੈਦ ਦੀ ਸਜ਼ਾ ਦਿੱਤੀ ਹੈ। ਅੰਕਿਤਾ ਦਾ ਕਤਲ 18 ਸਤੰਬਰ 2022 ਨੂੰ ਹੋਇਆ ਸੀ। ਅੰਕਿਤਾ ਪੁਲਕਿਤ ਆਰੀਆ ਦੇ ਵਨੰਤਰਾ ਰਿਸਾਰਟ ਵਿੱਚ ਰਿਸੈਪਸ਼ਨਿਸਟ ਵਜੋਂ ਕੰਮ ਕਰਦੀ ਸੀ।
ਅਦਾਲਤ ਦੇ ਫੈਸਲੇ ਤੋਂ ਪਹਿਲਾਂ ਅੰਕਿਤਾ ਦੇ ਪਿਤਾ ਵੀਰੇਂਦਰ ਸਿੰਘ ਨੇ ਕਾਤਲਾਂ ਲਈ ਫਾਂਸੀ ਦੀ ਮੰਗ ਕੀਤੀ ਸੀ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਦਰਿੰਦਿਆਂ ਨੇ ਉਨ੍ਹਾਂ ਦੀ ਮਾਸੂਮ ਧੀ ਦਾ ਕਤਲ ਕੀਤਾ, ਉਨ੍ਹਾਂ ਨੂੰ ਮੌਤ ਦੀ ਸਜ਼ਾ ਮਿਲਣੀ ਚਾਹੀਦੀ ਹੈ।
ਪੂਰਾ ਮਾਮਲਾ
19 ਸਾਲ ਦੀ ਅੰਕਿਤਾ ਰਿਸ਼ੀਕੇਸ਼ ਦੇ ਵਨੰਤਰਾ ਰਿਸਾਰਟ ਵਿੱਚ ਰਿਸੈਪਸ਼ਨਿਸਟ ਸੀ। 18 ਸਤੰਬਰ 2022 ਨੂੰ ਉਹ ਅਚਾਨਕ ਗਾਇਬ ਹੋ ਗਈ। ਇਸ ਤੋਂ ਬਾਅਦ ਉਸ ਦੇ ਪਿਤਾ ਨੇ ਰਿਸਾਰਟ ਪਹੁੰਚ ਕੇ ਕਰਮਚਾਰੀਆਂ ਨਾਲ ਪੁੱਛਗਿੱਛ ਕੀਤੀ। ਜਦੋਂ ਧੀ ਦਾ ਪਤਾ ਨਾ ਲੱਗਾ, ਤਾਂ ਉਨ੍ਹਾਂ ਨੇ ਗੁੰਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਈ।
ਪੁਲਕਿਤ ਤੋਂ ਪੁੱਛਗਿੱਛ ਵਿੱਚ ਉਸ ਨੇ ਦੱਸਿਆ ਕਿ ਅੰਕਿਤਾ ਰਿਸਾਰਟ ਦੇ ਇੱਕ ਕਮਰੇ ਵਿੱਚ ਰਹਿੰਦੀ ਸੀ ਅਤੇ ਕੁਝ ਦਿਨਾਂ ਤੋਂ ਮਾਨਸਿਕ ਤਣਾਅ ਵਿੱਚ ਸੀ। ਇਸ ਲਈ ਉਹ ਅਤੇ ਉਸ ਦੇ ਦੋਸਤ 18 ਸਤੰਬਰ ਨੂੰ ਅੰਕਿਤਾ ਨੂੰ ਰਿਸ਼ੀਕੇਸ਼ ਘੁਮਾਉਣ ਲੈ ਗਏ ਸਨ। ਦੇਰ ਰਾਤ ਸਾਰੇ ਵਾਪਸ ਆਏ ਅਤੇ ਰਿਸਾਰਟ ਦੇ ਵੱਖ-ਵੱਖ ਕਮਰਿਆਂ ਵਿੱਚ ਸੌਣ ਚਲੇ ਗਏ। 19 ਸਤੰਬਰ ਦੀ ਸਵੇਰ ਅੰਕਿਤਾ ਆਪਣੇ ਕਮਰੇ ਤੋਂ ਗਾਇਬ ਸੀ। ਪੁਲਿਸ ਜਾਂਚ ਵਿੱਚ ਇਹ ਕਹਾਣੀ ਝੂਠੀ ਸਾਬਤ ਹੋਈ।
ਸੀਸੀਟੀਵੀ ਫੁਟੇਜ ਵਿੱਚ ਖੁੱਲਿਆ ਰਾਜ਼
ਪੁਲਕਿਤ ਤੋਂ ਬਾਅਦ ਪੁਲਿਸ ਨੇ ਰਿਸਾਰਟ ਦੇ ਕਰਮਚਾਰੀਆਂ ਨਾਲ ਪੁੱਛਗਿੱਛ ਕੀਤੀ। ਉਨ੍ਹਾਂ ਦੱਸਿਆ ਕਿ ਅੰਕਿਤਾ ਰਿਸ਼ੀਕੇਸ਼ ਜਾਂਦੇ ਸਮੇਂ ਇਨ੍ਹਾਂ ਲੋਕਾਂ ਨਾਲ ਸੀ, ਪਰ ਵਾਪਸ ਨਹੀਂ ਆਈ। ਪੁਲਿਸ ਨੇ ਰਾਹ ਦੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ, ਜਿਸ ਤੋਂ ਪਤਾ ਲੱਗਾ ਕਿ ਰਿਸਾਰਟ ਤੋਂ ਜਾਂਦੇ ਸਮੇਂ ਚਾਰ ਲੋਕ ਸਨ, ਪਰ ਵਾਪਸ ਸਿਰਫ਼ ਤਿੰਨ ਹੀ ਆਏ।
