ਮੁੰਬਈ, 24 ਅਗਸਤ
ਕਰੋਨਾ ਦੀ ਲਾਗ ਤੋਂ ਉਭਰਨ ਮਗਰੋਂ ਮੈਗਾ ਸਟਾਰ ਅਮਿਤਾਭ ਬੱਚਨ ਕੰਮ ’ਤੇ ਪਰਤ ਆਏ ਹਨ। ਅਦਾਕਾਰ ਨੇ ਮਕਬੂਲ ਗੇਮ ਸ਼ੋਅ ‘ਕੌਣ ਬਣੇਗਾ ਕਰੋੜਪਤੀ’ ਸੀਜ਼ਨ 12 ਦੀਆਂ ਕੁਝ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਅਦਾਕਾਰ ਨੇ ਆਪਣੇ ਬਲਾਗ ’ਤੇ ਲਿਖਿਆ ਕਿ ਉਨ੍ਹਾਂ ਕਰੋਨਾਵਾਇਰਸ ਮਹਾਮਾਰੀ ਦਰਮਿਆਨ ਮੁਕੰਮਲ ਸੁਰੱਖਿਆ ਉਪਰਾਲਿਆਂ ਨਾਲ ਕੇਬੀਸੀ ਦੀ ਸ਼ੂਟਿੰਗ ਸ਼ੁਰੂ ਕਰ ਦਿੱਤੀ ਹੈ। ਮਾਰਚ ਮਹੀਨੇ ਆਇਦ ਲੌਕਡਾਊਨ ਕਰਕੇ ਫਿਲਮ ਨਗਰੀ ਮੁੰਬਈ ਵਿੱਚ ਫ਼ਿਲਮਾਂ ਤੇ ਟੀਵੀ ਲੜੀਵਾਰਾਂ ਦੀ ਸ਼ੂਟਿੰਗ ਬੰਦ ਕਰਨੀ ਪਈ ਸੀ। ਇਸੇ ਮਹੀਨੇ ਕੋਵਿਡ-19 ਤੋਂ ਉਭਰੇ ਅਦਾਕਾਰ ਨੇ ਐਤਵਾਰ ਨੂੰ ਪਹਿਲੀ ਵਾਰ ਸੈੱਟ ਦਾ ਦੌਰਾ ਕੀਤਾ। ਅਦਾਕਾਰ ਨੇ ਬਲਾਗ ਵਿੱਚ ਪੀਪੀਈ ਕਿੱਟਾਂ ਨਾਲ ਲੈਸ ਘੱਟੋ-ਘੱਟ ਸਟਾਫ਼ ਨਾਲ ਕੰਮ ਕਰਨ ਦੇ ਆਪਣੇ ਤਜਰਬੇ ਨੂੰ ਸਾਂਝਾ ਕੀਤਾ।
