ਅਮਰੀਕਾ ਵਿੱਚ ਇੱਕ ਹੋਰ ਜਹਾਜ਼ ਹਾਦਸਾ ਵਾਪਰਿਆ ਹੈ। ਅਮਰੀਕੀ ਜਲ ਸੈਨਾ ਦਾ ਜਹਾਜ਼ ਬੀਚ ‘ਤੇ ਹਾਦਸਾਗ੍ਰਸਤ ਹੋ ਗਿਆ। ਹਾਲਾਂਕਿ ਹਾਦਸੇ ‘ਚ ਜਹਾਜ਼ ਬੁਰੀ ਤਰ੍ਹਾਂ ਨਾਲ ਨੁਕਸਾਨਿਆ ਗਿਆ ਪਰ ਪਾਇਲਟਾਂ ਦੀ ਜਾਨ ਬਚ ਗਈ ਹੈ। ਉਨ੍ਹਾਂ ਨੂੰ ਮਛੇਰਿਆਂ ਅਤੇ ਤੱਟ ਰੱਖਿਅਕਾਂ ਦੀ ਮਦਦ ਨਾਲ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਇਹ ਹਾਦਸਾ ਸੈਨ ਡਿਏਗੋ ਨੇੜੇ ਵਿਡਬੇ ਟਾਪੂ ‘ਤੇ ਵਾਪਰਿਆ, ਜਿੱਥੇ ਅਮਰੀਕੀ ਜਲ ਸੈਨਾ ਦਾ ਈਏ-18 ਜੀ ਗ੍ਰੋਲਰ ਜੈੱਟ ਹਾਦਸਾਗ੍ਰਸਤ ਹੋ ਗਿਆ। ਵਿਡਬੇ ਟਾਪੂ ‘ਤੇ ਅਮਰੀਕੀ ਜਲ ਸੈਨਾ ਹਵਾਈ ਅੱਡੇ ‘ਤੇ ਪਿਛਲੇ ਚਾਰ ਮਹੀਨਿਆਂ ‘ਚ ਇਹ ਦੂਜਾ ਹਾਦਸਾ ਹੈ, ਜਦੋਂਕਿ ਪਿਛਲੇ ਡੇਢ ਮਹੀਨੇ ‘ਚ ਅਮਰੀਕੀ ਫੌਜ ਨਾਲ ਵਾਪਰਿਆ ਇਹ ਦੂਜਾ ਹਾਦਸਾ ਹੈ।
ਜੈੱਟ ਜਹਾਜ਼ ਨੇ ਬੁੱਧਵਾਰ ਨੂੰ ਭਾਰਤੀ ਸਮੇਂ ਅਨੁਸਾਰ ਸਵੇਰੇ 10:15 ਵਜੇ ਉਡਾਣ ਭਰੀ, ਪਰ ਕੁਝ ਹੀ ਪਲਾਂ ਵਿੱਚ ਇਹ ਕੰਟਰੋਲ ਗੁਆ ਬੈਠਾ ਅਤੇ ਸੈਨ ਡਿਏਗੋ ਖਾੜੀ ਵਿੱਚ ਡਿੱਗ ਗਿਆ। ਦੋਵੇਂ ਚਾਲਕ ਦਲ ਦੇ ਮੈਂਬਰ ਸਮੇਂ ਸਿਰ ਬਾਹਰ ਨਿਕਲ ਗਏ ਅਤੇ ਪਾਣੀ ਵਿੱਚ ਡਿੱਗ ਗਏ, ਜਿੱਥੋਂ ਉਨ੍ਹਾਂ ਨੂੰ ਮਛੇਰਿਆਂ ਅਤੇ ਯੂਐਸ ਕੋਸਟ ਗਾਰਡ ਨੇ ਲਗਭਗ 10 ਮਿੰਟਾਂ ਵਿੱਚ ਬਚਾ ਲਿਆ। ਦੋਵਾਂ ਪਾਇਲਟਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਨ੍ਹਾਂ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਹਾਦਸੇ ਦੀ ਪੁਸ਼ਟੀ ਯੂਐਸ ਕੋਸਟ ਗਾਰਡ ਦੇ ਬੁਲਾਰੇ ਪੈਟੀ ਅਫਸਰ ਕ੍ਰਿਸਟੋਫਰ ਸੇਪੀ ਨੇ ਕੀਤੀ ਹੈ।
ਰਿਪੋਰਟ ਦੇ ਅਨੁਸਾਰ, ਇਸ ਦੋ ਸੀਟਾਂ ਵਾਲੇ ਜੈੱਟ ਨੂੰ ਐਨਏਐਸ ਵਿਡਬੇ ਟਾਪੂ ‘ਤੇ ‘ਬਲੈਕ ਰੇਵੇਨਜ਼’ ਯੂਨਿਟ ਵਿੱਚ ਇਲੈਕਟ੍ਰਾਨਿਕ ਅਟੈਕ ਸਕੁਐਡਰਨ (VAQ) 135 ਦੇ ਤਹਿਤ ਤਾਇਨਾਤ ਕੀਤਾ ਗਿਆ ਸੀ। ਹਾਲਾਂਕਿ ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਹੋਇਆ ਹੈ ਕਿ ਜਹਾਜ਼ ਕੈਲੀਫੋਰਨੀਆ ਕਿਉਂ ਗਿਆ ਸੀ। ਬੁੱਧਵਾਰ ਦੁਪਹਿਰ ਤੱਕ ਵੀ ਇਸ ਦਾ ਮਲਬਾ ਖਾੜੀ ਦੇ ਅੰਦਰ ਹੀ ਸੀ।
