ਚੰਡੀਗੜ੍ਹ, 21 ਦਸੰਬਰ
ਸਾਲ 2014 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਮਾਡਲ ਸੁੰਦਰੀ ਪਨਾਗ ਗੁਲ ਦੇ ਹਾਰਨ ਤੋਂ ਬਾਅਦ ਚੰਡੀਗੜ੍ਹ ਵਿਚੋਂ ‘ਗੁੱਲ’ ਹੋਈ ਆਮ ਆਦਮੀ ਪਾਰਟੀ (ਆਪ) ਦੀ ਹੁਣ ਹਾਈਕਮਾਂਡ ਵਲੋਂ ਪੰਜਾਬ ਇਕਾਈ ਲਈ ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੂੰ ਇੰਚਾਰਜ ਨਿਯੁਕਤ ਥਾਪੇ ਜਾਣ ਨਾਲ ਮੁੜ-ਸੁਰਜੀਤੀ ਹੋਈ ਹੈ। ਪਾਰਟੀ ਦੀ ਕੌਮੀ ਕਾਰਜਕਾਰਨੀ ਦੇ ਮੈਂਬਰ ਅਤੇ ਯੂਟੀ ਚੰਡੀਗੜ੍ਹ ਦੇ ਇੰਚਾਰਜ ਹਰਜੋਤ ਸਿੰਘ ਬੈਂਸ ਨੇ ਪਾਰਟੀ ਦੀ ਚੰਡੀਗੜ੍ਹ ਇਕਾਈ ਦਾ ਗਠਨ ਕਰ ਦਿੱਤਾ ਹੈ। ਇਸ ਤਹਿਤ ਕਨਵੀਨਰ ਚਾਰਟਰਡ ਅਕਾਊਂਟੈਂਟ (ਸੀਏ) ਪ੍ਰੇਮ ਗਰਗ ਅਤੇ ਜਨਰਲ ਸਕੱਤਰ ਚੰਡੀਗੜ੍ਹ ਪੁਲੀਸ ਦੇ ਸੇਵਾਮੁਕਤ ਡੀਐਸਪੀ ਵਿਜੈ ਪਾਲ ਸਿੰਘ ਨੂੰ ਨਿਯੁਕਤ ਕੀਤਾ ਹੈ।
ਸ੍ਰੀ ਬੈਂਸ ਨੇ ‘ਪੰਜਾਬੀ ਟ੍ਰਿਬਿਊਨ’ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਪਾਰਟੀ ਨੇ 2019 ਦੀਆਂ ਲੋਕ ਸਭਾ ਚੋਣਾਂ ਲਈ ਚੰਡੀਗੜ੍ਹ ਵਿਚ ਆਪਣੀ ਸਿਆਸੀ ਜ਼ਮੀਨ ਤਿਆਰ ਕਰਨ ਲਈ ਇਕਾਈ ਬਣਾਈ ਹੈ। ਉਨ੍ਹਾਂ ਕਿਹਾ ਕਿ 2014 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਪਾਰਟੀ ਦੀ ਉਮੀਦਵਾਰ ਗੁਲ ਨੂੰ ਵੋਟਰਾਂ ਨੇ ਭਾਰੀ ਹੁੰਗਾਰਾ ਦਿੱਤਾ ਸੀ ਪਰ ਸਮੁੱਚੀ ਲੀਡਰਸ਼ਿਪ ਦੇ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਵਿਚ ਰੁੱਝੇ ਹੋਣ ਕਾਰਨ ਚੰਡੀਗੜ੍ਹ ਨਗਰ ਨਿਗਮ ਦੀਆਂ ਦਸੰਬਰ 2016 ’ਚ ਹੋਈਆਂ ਚੋਣਾਂ ਨਾ ਲੜਨ ਦਾ ਫੈਸਲਾ ਲੈਣਾ ਪਿਆ। ਹੁਣ ਚੰਡੀਗੜ੍ਹ ਇਕਾਈ ਨੂੰ ਜ਼ਮੀਨੀ ਪੱਧਰ ਤੱਕ ਮਜ਼ਬੂਤ ਕਰਕੇ ਇਥੇ ਪਾਰਟੀ ਦੀਆਂ ਸਰਗਰਮੀਆਂ ਤੇਜ਼ ਕੀਤੀਆਂ ਜਾਣਗੀਆਂ। ਦੱਸਣਯੋਗ ਹੈ ਕਿ ਬਸਪਾ ਦੇ ਬਹੁਤਾ ਸਰਗਰਮ ਨਾ ਹੋਣ ਕਾਰਨ ਚੰਡੀਗੜ੍ਹ ਦੇ ਸਿਆਸੀ ਅਖਾੜੇ ਵਿਚ ਮੁੱਖ ਤੌਰ ’ਤੇ ਕਾਂਗਰਸ ਅਤੇ ਭਾਜਪਾ ਹੀ ਦੋ ਮਜ਼ਬੂਤ ਸਰਗਰਮ ਹਨ। ਹੁਣ ‘ਆਪ’ ਦੇ ਚੋਣ ਅਖਾੜੇ ਵਿਚ ਆਉਣ ਨਾਲ ਚੰਡੀਗੜ੍ਹ ਦੇ ਸਿਆਸੀ ਸਮੀਕਰਨ ਬਦਲ ਸਕਦੇ ਹਨ। ਉਂਜ ‘ਆਪ’ ਵਿਚੋਂ ਕੌਮੀ ਪੱਧਰ ’ਤੇ ਯੋਗੇਂਦਰ ਯਾਦਵ ਵਲੋਂ ਪਾਰਟੀ ਛੱਡਣ ਤੋਂ ਬਾਅਦ ਚੰਡੀਗੜ੍ਹ ਵਿਚ ਵੀ ਇਕ ਧੜਾ ਵੱਖਰੇ ਤੌਰ ’ਤੇ ਚੱਲ ਰਿਹਾ ਹੈ। ‘ਆਪ’ ਵੱਲੋਂ ਚੰਡੀਗੜ੍ਹ ਇਕਾਈ ਲਈ ਐਲਾਨੀ ਟੀਮ ਵਿਚ ਸ੍ਰੀ ਗਰਗ ਤੇ ਵਿਜੈ ਪਾਲ ਸਿੰਘ ਤੋਂ ਇਲਾਵਾ ਵੀਨਾ ਸ਼ਰਮਾ ਨੂੰ ਕੋ-ਕਨਵੀਨਰ ਨਿਯੁਕਤ ਕੀਤਾ ਹੈ। ਨਰੇਸ਼ ਗਰਗ ਬੌਬੀ, ਪੀ.ਪੀ. ਘਈ, ਨਾਜਰ ਸਿੰਘ ਧਾਲੀਵਾਲ ਤੇ ਸਤੀਸ਼ ਮਾਸ਼ਲ ਨੂੰ ਜਨਰਲ ਸਕੱਤਰ; ਐਚ.ਕੇ. ਅਰੋੜਾ ਨੂੰ ਸਕੱਤਰ; ਬਿਕਰਮ ਪੁਧੀਰ ਨੂੰ ਜਥੇਬੰਦਕ ਸਕੱਤਰ; ਕੌਸ਼ਲ ਸਿੰਘ, ਯੋਗੇਸ਼ ਸੋਨੀ, ਸ਼ਿਸੂਪਾਲ, ਕਲਾਨਾ ਦਾਸ, ਲਾਡੀ ਪੰਨੂੰ ਤੇ ਸੰਦੀਪ ਨੂੰ ਜੁਆਇੰਟ ਸਕੱਤਰ ਅਤੇ ਪ੍ਰੋ. ਗੁਰਦੇਵ ਸਿੰਘ, ਨੀਕਿਤਾ ਪੰਡਿਤ, ਰੋਜ਼ਲੀਨ, ਮਲਕੀਤ ਸਿੰਘ, ਕਾਂਤਾ ਧਮੀਜਾ, ਪ੍ਰਿੰਸ ਜੁਨੇਜਾ, ਸਤਨਾਮ ਸਿੰਘ, ਗੁਰਦੀਪ ਸਿੰਘ, ਰਵੀ ਮਨੀ ਅਤੇ ਆਰਤੀ ਸ਼ਰਮਾ ਨੂੰ ਕਾਰਜਕਾਰਨੀ ਦਾ ਮੈਂਬਰ ਨਿਯੁਕਤ ਕੀਤਾ ਹੈ।
ਮੇਅਰ ਦੀ ਚੋਣ 9 ਨੂੰ
ਪ੍ਰਸ਼ਾਸਨ ਵਲੋਂ ਨਗਰ ਨਿਗਮ ਦੇ ਨਵੇਂ ਮੇਅਰ, ਸੀਨੀਅਰ ਡਿਪਟੀ ਮੇਅਰ ਅਤੇ ਡਿਪਟੀ ਮੇਅਰ ਦੀ ਚੋਣ 9 ਜਨਵਰੀ ਨੂੰ ਕਰਵਾਉਣ ਦਾ ਐਲਾਨ ਕਰਨ ਤੋਂ ਬਾਅਦ ਭਾਜਪਾ ਵਿਚ ਸਿਆਸੀ ਸਰਗਰਮੀਆਂ ਤੇਜ਼ ਹੋ ਗਈਆਂ ਹਨ। ਇਸ ਵਾਰ 9 ਨਾਮਜ਼ਦ ਕੌਂਸਲਰਾਂ ਕੋਲੋਂ ਵੋਟ ਪਾਉਣ ਦਾ ਹੱਕ ਖੋਹਣ ਕਾਰਨ ਚੁਣੇ 26 ਮੈਂਬਰ ਹੀ ਮੇਅਰ ਦੀ ਚੋਣ ਲਈ ਵੋਟਾਂ ਪਾਉਣ ਲਈ ਅਧਿਕਾਰਤ ਹੋਣਗੇ।
